म. टा. प्रतिनिधी, पुणे
साहित्य संमेलनाकडे साहित्यप्रेमी आकर्षित करण्यासाठी ८९व्या साहित्य संमेलनाचे हटके प्रमोशन करण्यात येत आहे. सोशल मीडिया, होर्डिंग, टीव्ही, रेडिओ अशा सर्व माध्यमांचा वापर करून संमेलनाची प्रथमच जाहिरात केली जात आहे.
अखिल भारतीय मराठी साहित्य महामंडळाचे ८९वे अखिल भारतीय मराठी साहित्य संमेलन यंदा १५ ते १९ जानेवारीदरम्यान पिंपरी-चिंचवड येथे होत आहे. डॉ. डी. वाय. पाटील विद्यापीठ सोसायटीतर्फे या संमेलनाचे आयोजन करण्यात येत आहे. पिंपरी-चिंचवड येथे प्रथमच साहित्य संमेलन होत असल्याने वेगळ्या पद्धतीने करण्यासाठी आयोजक प्रयत्नशील आहेत. त्यामुळे हे संमेलन व्यापक पद्धतीने व्हावे, त्याला जास्तीत जास्त प्रतिसाद मिळण्यासाठी त्याच्या जाहिरातीवर भर देण्यात येत आहे. आतापर्यंत साहित्य संमेलनाला वेबसाइट, फेसबुक पेजच्या माध्यमातून पोहोचवण्यात येत होते. मात्र, डॉ. डी. वाय. पाटील विद्यापीठ सोसायटीतर्फे 'साहित्य मित्र' अँड्रॉइड अॅप, होर्डिंग या माध्यमांचाही वापर करण्यात येत आहे.
गुलजार, चेतन भगत, जावेद अख्तर, शरद पवार यांच्यासारख्या मान्यवर व्यक्ती संमेलनाला येत आहेत. त्यामुळे 'साहित्य संमेलनाला आम्ही येतोय... तुम्हीही चला' असा संदेश देणारी होर्डिंगही येत्या दोन दिवसांत लावली जाणार आहेत, अशी माहिती स्वागताध्यक्ष डॉ. पी. डी. पाटील यांनी दिली.
'साहित्य संमेलनाला तरुणांचा मोठा प्रतिसाद मिळावा, असा आमचा प्रयत्न आहे. तरुणवर्गाला आकर्षित करण्यासाठी त्यांच्या भाषेत संवाद साधला पाहिजे. त्यासाठीच सोशल मीडिया, वेबसाइट, अॅप्लिकेशन अशा माध्यमांची मदत घेतली जात आहे. साहित्य संमेलनाला कोण कोण साहित्यिक, मान्यवर व्यक्ती येणार, हे साहित्यप्रेमींना कळण्यासाठी होर्डिंग लावण्याचा निर्णय घेतला आहे,' असेही त्यांनी स्पष्ट केले.
..............
रेडिओ, टीव्हीवरही जाहिराती
खास या साहित्य संमेलनासाठी जिंगल, अॅनिमेटेड लोगोही तयार करण्यात आला. युट्यूबवर त्या ऐकण्या-पाहण्यासाठी उपलब्ध आहे. आता 'माझी मराठी माय मराठी' ही जिंगल आकाशवाणीच्या सर्व केंद्रांवरून प्रसारित केली जाणार आहे. पुढील टप्प्यात एफएम वाहिन्यांवरूनही जाहिरात केली जाणार आहे. लोगोचा वापर करून टीव्हीवरील जाहिरातीही सुरू करण्यात येणार आहेत.
...............
अॅप्लिकेशनचे डाउनलोड - ५००हून अधिक
फेसबुक पेज सदस्य - सुमारे सात हजार
वेबसाइट हिट्स - दररोज सुमारे अडीच हजार
मोबाइल अॅप डाउनलोड करा आणि राहा अपडेट
