म. टा. प्रतिनिधी, पुणे दिवसाढवळ्या हिवताप कार्यालयात दारूच्या पार्ट्या व जुगार खेळण्याचे प्रकार घडल्याचे उघडकीस आल्यानंतर संबंधित कर्मचाऱ्यांसह जिल्हा हिवताप अधिकारी डॉ. अशोक रासगे यांना कारणे दाखवा नोटीस बजावण्यात आली आहे. या प्रकाराच्या चौकशीचे आदेशही सहसंचालक डॉ. कांचन जगताप यांनी दिले. लोहगाव रस्त्यावरील या कार्यालयात मलेरिया नियंत्रणाच्या चाचण्या करण्यात येतात. या खात्यातील कर्मचारी कार्यालयातच दारूच्या पार्ट्यांसह जुगार खेळत असल्याचे सर्वप्रथम 'महाराष्ट्र टाइम्स'ने उघडकीस आणले. त्यानंतर संबंधित विभागात खळबळ उडाली आणि सहसंचालकांनीही त्याची गंभीर दखल घेतली. सध्या दौंडचे आरोग्य अधिकारी डॉ. रासगे यांच्याकडे विभागाचा अतिरिक्त कार्यभार सोपविण्यात आला आहे. वरिष्ठ अधिकारी आठवड्यातून दोनदाच कार्यालयात येतात. त्याचा गैरफायदा घेऊन कार्यालयातील तांत्रिक अधिकारी, कर्मचारी, शिपाई, क्षेत्र कर्मचारी यांच्यापैकी काहीजण दारू पिण्यात आणि जुगार खेळण्यात मश्गुल असल्याचे आढळून आले होते. मात्र, या प्रकारांकडे जाणीवपूर्वक दुर्लक्ष करण्यात आले होते. 'संबंधित १५ कर्मचाऱ्यांना नोटिसा देण्यात आल्या असून, भविष्यात आणि यापुढे असे प्रकार घडणार नाहीत अशी ताकीदही देण्यात आली आहे. तसेच, आपण अतिरिक्त पदातून कार्यमुक्त करण्यासाठी पत्र दिले आहे', असे डॉ. रासगे यांनी सांगितले. दरम्यान, या प्रकाराबाबत सहायक संचालक पदावरील अधिकाऱ्यामार्फत चौकशीचे आदेश दिले आहेत. या प्रकरणाबाबत खुलासा देण्यात यावा, अशी नोटीस डॉ. रासगे यांना देण्यात आली. त्यांना कार्यमुक्त करण्याबाबत २८ डिसेंबरनंतर निर्णय घेण्यात येईल, असेही त्यांनी स्पष्ट केले. .. हिवताप अधिकाऱ्यांना या प्रकाराबाबत नोटीस देण्यात आली आहे. गैरवर्तणूक करणाऱ्यांवर शिस्तभंगाची कारवाई केली जाईल. असे गैरप्रकार खपवून घेऊ नयेत, असे आदेश अतिरिक्त जिल्हा आरोग्य अधिकारी, जिल्हा वैद्यकीय अधिकाऱ्यांना देण्यात आले आहेत. डॉ. कांचन जगताप, सहसंचालक, मलेरिया आरोग्य विभाग
मोबाइल अॅप डाउनलोड करा आणि राहा अपडेट