म. टा. प्रतिनिधी, पिंपरी
'लोकांनी दिलेली मजबुतीची साथ हाच माझा खरा सत्कार आहे,' अशी भावना राष्ट्रवादी काँग्रेसचे अध्यक्ष आणि ज्येष्ठ नेते शरद पवार यांनी शनिवारी व्यक्त केली.
अखिल भारतीय मराठी नाट्य परिषद मध्यवर्ती संघटना मुंबईतर्फे चिंचवड येथील प्रा. रामकृष्ण मोरे प्रेक्षागृहात आयोजित सत्कार सोहळ्याला उत्तर देताना ते बोलत होते. या कार्यक्रमात ज्येष्ठ संगीतकार पं. हृदयनाथ मंगेशकर आणि अशोक पत्की, अखिल भारतीय मराठी नाट्य परिषदेचे नियोजित संमेलनाध्यक्ष गंगाराम गवाणकर, ज्येष्ठ नाट्य अभिनेते जयंत सावरकर, भारताचे माजी कसोटीपटू चंदू बोर्डे, ज्येष्ठ लोककलावंत कलाबाई काळे-नगरकर, पिंपरी-चिंचवडचे प्रथम महापौर ज्ञानेश्वर लांडगे, ज्येष्ठ कलाकार लता नार्वेकर, बाळ कर्वे यांचा विशेष सत्कार करण्यात आला.
अमृतमहोत्सवी वाढदिवसानिमित्त ठिकठिकाणी सत्कार होत आहेत, असे नमूद करून पवार म्हणाले, 'कधी कधी विचार करतो. कशासाठी हे सत्कार चाललेत? लोकांनी मला कुठे नेऊन ठेवले? आंतरराष्ट्रीय पातळीवर काम करण्याची संधी मिळाली. परंतु, त्याहीपेक्षा महत्त्वाचे म्हणजे तुम्ही मला मजबुतीने दिलेली साथ होय. कर्तृत्त्ववान व्यक्तींना मदत करता आली, हे भाग्य समजतो.'
'देशाची लोकसभा अनेक वर्षे पाहतो. येथे १९८४मध्ये प्रवेशाची पहिली मुहुर्तमेढ पिंपरी-चिंचवडपासून झाली. आजही पुण्याला जात असताना पिंपरी-चिंचवडमधील झालेला बदल उल्लेखनीय वाटतो. त्यामध्ये अण्णासाहेब मगर, प्रा. रामकृष्ण मोरे आणि अजित पवार यांचा मोलाचा वाटा आहे. इतके चांगले काम कदाचित मलाही जमले नसते,' असे पवार म्हणाले.
'अनंत अमुची ध्येयासक्ती' या काव्यपंक्तीप्रमाणे पवार जगले असे हृदयनाथ मंगेशकर म्हणाले. आयपीएल क्रिकेटचे शिल्पकार म्हणून बोर्डे यांनी पवारांचा गौरव केला. 'पाहुनिया चंद्रवदन, मला साहिना मदन' या ओळी म्हणत कलाबाईंनी ठसठशीत स्वरांची झलक व्यक्त केली. तर, शरद पवार यांचे पुस्तक म्हणजे धर्मग्रंथ असल्याचे गवाणकर यांनी नमूद केले. 'साहेब पंतप्रधान होऊ शकले नाहीत, हे आपले आणि देशाचे दुर्दैव आहे,' अशी खंत मोहन जोशी यांनी व्यक्त केली.
सोनियांच्या आठवणीचे आश्चर्य
दिल्लीतील सत्काराच्या वेळी काँग्रेसच्या अध्यक्षा सोनिया गांधी यांनी केलेल्या कौतुकाचा धागा पकडून शरद पवार म्हणाले, 'माझे सासरे सदू शिंदे लेगस्पीनर होते. त्यांची मुलगी माझी पत्नी. त्यामुळे मी कितीही चांगला बॅटिंग करणारा असलो तरी विकेट जाणारच, हे नक्की आहे. सोनियांजीनी करून दिलेल्या आठवणीचे मलाही आश्चर्य वाटले.'
