म. टा. प्रतिनिधी, पुणे
पुण्यात अकरावीत शिकणाऱ्या सोळा वर्षांच्या मुलीला 'इस्लामिक स्टेट' (आयएस) या दहशतवादी संघटनेत जाण्यापासून रोखण्यात दहशतवाद विरोधी पथकाला (एटीएस) यश आले. ही मुलगी गेल्या चार महिन्यांपासून सोशल नेटवर्किंग साइट्सच्या माध्यमातून सौदी अरेबिया, केनिया, दुबई, ब्रिटन या देशांतील 'आयएस'शी संबंधित सुमारे दोनशे संशयितांच्या संपर्कात होती. या मुलीचे समुपदेशन करण्यात आले असून, तिच्यावर तपास यंत्रणांनी 'नजर' ठेवल्याचे सूत्रांनी सांगितले.
'एटीएस'चे प्रमुख विवेक फणसळकर आणि विशेष पोलिस महानिरीक्षक निकेत कौशिक यांना या मुलीबाबत माहिती मिळाली होती. त्यानुसार पुणे युनिटचे प्रमुख भानुप्रताप बर्गे यांच्या पथकाने खबऱ्यांच्या आणि तांत्रिक पुराव्यांच्या साह्याने या मुलीची पूर्ण माहिती मिळवून तिची ओळख पटवली. गेल्या दहा दिवसांपासून हे 'ऑपरेशन' सुरू होते.
राजस्थान येथे दोन आठवड्यांपूर्वी 'इंडियन ऑइल' या कंपनीमधील मॅनेजर सिराजउद्दीन याला अटक झाली होती. सुसाइड बॉम्बर बनण्यापर्यंत या मुलीची मानसिक तयारी झाली होती. सिराजउद्दीनच्या अटकेनंतर त्याच्या सोशल नेटवर्किंग साईटस् वरील एका ग्रूपमध्ये तिचे अकाऊंट आढळले होते.
''आयएस' शी संबंधित बातम्या पाहून या मुलीचे कुतहल जागे झाले होते. वारंवार बातम्या पाहणे, इंटरनेटवर सर्च करून 'आयएस'ची तिने माहिती मिळवली आणि प्रभावाखाली आली. फेसबुकच्या माध्यमातून तिने 'आयएस'शी संपर्क करण्याचा प्रयत्न केला. ती पहिल्यांदा एका श्रीलंकन 'हँडलर'च्या संपर्कात आली. त्याला श्रीलंकेत अटक झाली आहे. त्याच्या माध्यमातून ती सिराजउद्दीनच्या संपर्कात आली होती,' असे सूत्रांनी नमूद केले.
'आयएस'शी संबंधित एका गटात समावेश झाल्यानंतर तिचा कट्टरतेकडील प्रवास सुरू झाला. तिला पुढील वर्षी सीरियात नेण्यात येणार होते. तेथे तिला वैद्यकीय शिक्षण देण्यात येईल आणि 'आयएस' त्याचा खर्च करेल, असे तिला भासवण्यात आले. या गटात ब्रिटन, सौदी अरेबिया, केनिया, दुबई या देशांपासून महाराष्ट्र, राजस्थान, तेलंगण, तमिळनाडू, जम्मू-काश्मीर, कर्नाटक या राज्यातील काही जणांचा समावेश होता. या मुलीच्या संपर्कात आलेल्या अनेक मुलींनाही तिने 'आयएस'च्या जाळण्यात ओढण्याचा प्रयत्न केल्याचे उघडकीस आले आहे.
'मुलांना सांभाळा'
'आयएस'च्या प्रचाराच्या जाळ्यात आपली मुले अडकणार नाहीत, यासाठी तेरा ते तीस वयोगटातील मुला-मुलींच्या पालकांनी सावधानता बाळगण्याची आवश्यकता आहे, असे आवाहन सहायक आयुक्त भानुप्रताप बर्गे यांनी केले आहे. मुलांच्या वागण्यात अचानक मोठा बदल दिसल्यास पोलिसांशी संपर्क साधण्याचे आवाहनही त्यांनी केले आहे.
मोबाइल अॅप डाउनलोड करा आणि राहा अपडेट
