पिंपरी : तरुण-तरुणीच्या मृत्यूस कारणीभूत ठरल्याबद्दल पेस्ट कंट्रोल करणाऱ्यांविरोधात निगडी पोलिस ठाण्यात गुन्हा दाखल करण्यात आला आहे. यमुनानगर येथील घरात पेस्ट कंट्रोल केल्यानंतर घरात गेलेल्या तरुण तरुणीचा श्वास गुदमरल्यामुळे मृत्यू झाला होता. ही घटना ३१ ऑक्टोबर रोजी घडली होती.
धवल शंकर लगाडिया (वय-२४, रा. यमुनानगर, निगडी) व मंदिरा रामलाल चौधरी (वय-२६, रा. सीआरपीएफ, तळेगाव) असे मृत्यू झालेल्या तरुण-तरुणीचे नाव आहे. त्यांच्या मृत्यूप्रकरणी पेस्ट कंट्रोल करणाऱ्या लक्ष्मण जगन्नाथ वाळंज याच्याविरोधात गुन्हा दाखल करण्यात आला आहे. पोलिसांनी दिलेल्या माहितीनुसार, यमुनानगर भागात राहणाऱ्या लगाडिया यांच्या फ्लॅटमध्ये ३१ ऑक्टोबरला पेस्ट कंट्रोलचे काम करण्यात आले होते. त्याच दिवशी सायंकाळी लगाडिया यांचा मुलगा धवल हा त्याची मैत्रीण मंदिराला घरी गेला होता. या वेळी ते दोघे घरात एकटेच होते.
काही वेळाने पेस्ट कंट्रोलचा त्रास होऊ लागला, त्या दोघांचाही श्वास गुदमरल्याने दोघांनाही तातडीने खासगी रुग्णालयात दाखल करण्यात आले. मात्र, उपचारादरम्यान त्याच दिवशी रात्री नऊच्या सुमारास धवलचा तर दुसऱ्या दिवशी सकाळी सातच्या सुमारास मंदिराचा मृत्यू झाला.या प्रकरणाचा तपास करीत असता पेस्ट कंट्रोल करणाऱ्या लक्ष्मण वाळूंज याने पेस्ट कंट्रोल करताना प्राणघातक औषधी कीटकनाशकाचा वापर प्रमाणात न केल्यामुळे व ते औषध वापरण्यासाठी लागणारा कृषी विभागाचा परवाना नसतानाही
त्या औषधांचा वापर केल्यामुळे त्या दोघांचा मृत्यू झाल्याचे निष्पन्न झाले. त्यामुळे वाळूंजविरोधात निगडी पोलिस ठाण्यात गुन्हा दाखल करण्यात
आला आहे.
चौदा लाखांचे केमिकल जप्त
पिंपरी ः बेकायदा केमिकलची वाहतूक करणाऱ्या दोघांना गुन्हे शाखा युनिट चारच्या पथकाने सापळा रचून जेरबंद केले. त्यांच्याकडून १४ लाख रुपये किंमतीचे ३१ केमिकलचे बॅरल जप्त केले. शुक्रवारी (११ डिसेंबर) मोहनगर, चिंचवड येथे केली.
रामकुमार निरहू यादव (वय ३३, रा. लालटोपीनगर झोपडपट्टी, मोरवाडी), रामलाल गंगाराम देवकर (वय ५३, रा. आण्णासाहेब मगर झोपडपट्टी, पिंपरी) अशी अटक केलेल्यांची नावे आहेत. पोलिसांनी दिलेल्या माहितीनुसार, गुन्हे शाखेचे पोलिस नाईक अमित गायकवाड यांना खबऱ्यांमार्फत माहिती मिळाली, की चिंचवड परिसरातून दोन टेम्पोमधून बेकायदा केमिकलची वाहतूक होत आहे. त्यानुसार पोलिसांनी सापळा रचून चिंचवड, मोहनगर येथून त्यांना ताब्यात घेतले. त्यांच्याकडे केमिकलचे १४ लाख रुपये किंमतीचे ३१ बॅरलसह दोन टेम्पो जप्त केले. युनिट चारचे वरिष्ठ निरीक्षक लक्ष्मण बोराटे, फौजदार बाबा शेख, धनंजय चव्हाण, अमित गायकवाड, संतोष बर्गे, हेमंत खरात, अर्जुन भांबुरे, शशिकांत शिंदे, गणेश काळे, प्रमोद वेताळ, संजय गवारे, प्रमोद लांडे, विवेकानंद सपकाळे, राजे काकडे, अंकुश जोगदंडे, मोहनदास पाटील यांच्या पथकाने ही कारवाई केली.
पोलिसाला चावणाऱ्यास अटक
पिंपरी ः दारू पिताना हटकल्याबद्दल पोलिसाच्या हाताचा चावा घेणाऱ्यास वाकड पोलिसांनी अटक केली आहे. या प्रकरणी सरकारी कामात अडथळा आणल्याचा गुन्हा दाखल करण्यात आला आहे.
महेश तिमन्ना पवार (वय ४८, रा. थेरगाव) असे अटक करण्यात आलेल्याचे नाव आहे. तर या प्रकरणी पोलिस नाईक गजानन जाधव यांनी वाकड पोलिस ठाण्यात फिर्याद दिली आहे. पोलिसांनी दिलेल्या माहितीनुसार, जाधव व कर्मचारी जगदाळे हे ताथवडे ते डांगे चौकात या दरम्यान रात्री गस्त घालत होते. या वेळी पवार हा डांगे चौकातील उड्डाणपुलाखाली दारू पित असल्याचे पोलिसांना दिसले. त्यांनी पवार याला हटकले असता, त्याने रस्त्यावर पडलेल्या सिमेंटच्या वीटा पोलिसांच्या दिशेने फेकल्या. त्यामुळे त्याला पकडण्यासाठी जाधव गेले. तेव्हा पवार याने जाधव यांच्या हाताचा चावा घेतला.
मोबाइल अॅप डाउनलोड करा आणि राहा अपडेट
