इतिहासाची मोडतोड करून 'बाजीराव मस्तानी' चित्रपटात श्रीमंत बाजीराव पेशवे यांच्या पराक्रमाची विटंबना केली आहे. 'पिंगा' व 'मल्हारी'या गाण्यांद्वारे चुकीचा इतिहास मांडण्यात आला आहे. त्यामुळे चित्रपट प्रदर्शित करण्यापूर्वी पेशव्यांचे वंशज आणि इतिहास संशोधकांना दाखवावा, अन्यथा चित्रपटगृहातील खेळ बंद पाडण्यात येतील, असा इशारा थोरले बाजीराव पेशवे प्रतिष्ठानतर्फे शनिवारी देण्यात आला.
प्रतिष्ठानतर्फे शनिवारवाडा येथे चित्रपटाची निषेध सभा आयोजिण्यात आली होती. या वेळी या चित्रपटाचे दिर्ग्दशक संजय लीला भन्साळी यांच्या प्रतिकात्मक पुतळ्याला जोडे मारून तो जाळण्यात आला. पेशव्यांचे वंशज उदयसिंह पेशवे, महेंद्रसिंह पेशवे, सत्यशील दाभाडे, ज्येष्ठ रंगकर्मी श्रीकांत मोघे, मुरारबाजी देशपांडे यांचे वंशज संदीप पोतनीस, आमदार मेधा कुलकर्णी, अनुराधा सहस्रबुद्धे, देवव्रत बापट, अंकित काणे, विलास तुपे, नगरसेवक मिलिंद काची, मंदार लवाटे, पराग गोखले, सुनील चौधरी, सुनील माने या वेळी उपस्थित होते.
चित्रपटात मस्तानी आणि काशीबाई एका गाण्यावर थिरकत असल्याचे दाखवले आहे. त्या काळातील राज घराण्यातील स्त्रिया अशा प्रकारे नाचणे शक्य नाही. याबरोबरच संपूर्ण चित्रपटात मोठ्या प्रमाणात इतिहासाची आणि संस्कृतीची मोडतोड झालेली असू शकते. त्यामुळे हा चित्रपट इतिहासतज्ज्ञांना दाखवावा आणि त्यांनी सांगितलेल्या सुधारणा कराव्यात, अशी सूचना उदयसिंह पेशवे यांनी केली.
'काशीबाई आणि मस्तानी यांचे एकत्रित नाचणे मराठी जनता सहन करेल, अशा भ्रमात भन्साळींनी राहू नये. बाजीरावांच्या पराक्रमाचा इतिहास बाजूला ठेवून भलताच इतिहास लोकांच्या गळी उतरविण्याचा हा प्रयत्न आहे,' अशी टीका मोघेंनी केली. 'ही इतिहासाच्या अस्मितेची लढाई आहे. श्रद्धास्थानांची विटंबना करण्याच्या प्रथांना वेळीच आळा घातला नाही, तर असे प्रकार अन्य महापुरुषांच्या संदर्भातही होऊ शकतील,' असे मत कुलकर्णी यांनी व्यक्त केले. 'चित्रपटाची कथा लिहिण्यापूर्वी भन्साळींनी पेशव्यांच्या वंशजांशी संपर्क साधणे गरजेचे होते. काशीबाई आणि मस्तानी एकत्र नाचल्याचा कोणताही पुरावा उपलब्ध नाही. त्यामुळे या चित्रपटाला आमचा विरोध राहणार आहे,' असे महेंद्रसिंह पेशवे म्हणाले.
मोबाइल अॅप डाउनलोड करा आणि राहा अपडेट
