'ई सर्च'द्वारे २००२ पूर्वीच्या प्रॉपर्टीच्या दस्तनोंदी ऑनलाइन बघण्याची व्यवस्था नसल्याने येणारी अडचण आता दूर होणार आहे. कारण नोंदणी आणि मुद्रांक विभागाकडून १९८५ पासूनच्या प्रॉपर्टीच्या दस्त नोंदी पाहण्याची व्यवस्था केली जाणार असून, मार्च महिन्यापासून नागरिकांना याचा लाभ मिळू शकणार आहे.
नोंदणी आणि मुद्रांक विभागाने 'आय सरिता' या सॉफ्टवेअरद्वारे प्रॉपर्टीच्या दस्त नोंदी ऑनलाइन बघण्याची व्यवस्था २०११पासून सुरू केली आहे. याद्वारे २००२पासूनच्या नोंदी नागरिकांना ऑनलाइन पाहता येतात. मात्र, त्यापूर्वीच्या दस्त नोंदी पाहण्याची व्यवस्था नाही. त्यासाठी आता १९८५पासूनच्या दस्त नोंदी बघण्याची सुविधा देण्यासाठी काम सुरू झाले आहे. मार्च २०१६पासून ही सोय उपलब्ध होणार असल्याचे राज्याचे नोंदणी आणि मुद्रांक महानिरीक्षक एन. रामास्वामी यांनी सांगितले.
प्रॉपर्टीचा व्यवहार करण्यापूर्वी प्रॉपर्टीच्या मालकी हक्कात झालेले बदल तपासणे खरेदीदाराच्या दृष्टीने हिताचे असते. यापूर्वी मालकी हक्कात झालेले बदल तपासण्यासाठी संबंधित कार्यालयात जाऊन नागरिकांना माहिती घ्यावी लागत होती. आता १९८५पासूनच्या दस्त नोंदी ई-सर्चद्वारे ऑनलाइन बघण्याची सुविधा होणार असल्याचे एन. रामास्वामी यांनी स्पष्ट केले.
नागरिकांना प्रॉपर्टी खरेदी करण्यापूर्वी संबंधित प्रॉपर्टीचा सर्च रिपोर्ट घ्यावा लागतो. त्यासाठी www.igrmaharashtra.gov.in या वेबसाइटवरून ई-सर्चद्वारे ही सुविधा मिळते. प्रॉपर्टीचा क्रमांक किंवा दस्ताच्या क्रमांकावरून यापूर्वी झालेले व्यवहार शोधता येतात.
नागरिकांचे हेलपाटे वाचणार
आता १९८५ पूर्वीच्या दस्त नोंदी बघण्याची सोय होणार असल्याने नागरिकांचे हेलपाटे कमी होणार आहेत. नागरिकांना कोणत्याही प्रॉपर्टीची दस्त नोंदणी ऑनलाइन बघता येते; तसेच ठराविक शुल्क भरून नोंदीची कागदपत्रे मिळू शकतात. आता ३० वर्षांपूर्वी झालेल्या दस्त नोंदी घरबसल्या नागरिकांना ई-सर्चद्वारे पाहता येणार आहेत.
मोबाइल अॅप डाउनलोड करा आणि राहा अपडेट
