म. टा. प्रतिनिधी, पुणे
रेल्वेच्या एखाद्या अपघातातील जखमींना पुणे रेल्वे स्टेशन व पुणे विभागातील अन्य महत्त्वाच्या जंक्शनवर वैद्यकीय सेवा पुरविण्याची कोणतीही सोय उपलब्ध नाही. मध्य रेल्वेने मुंबई विभागातील नऊ उपनगरीय स्टेशनवर पब्लिक प्रायव्हेट पार्टनरशिप (पीपीपी) तत्त्वावर आपत्कालीन वैद्यकीय सेवा केंद्र सुरू करण्याचा निर्णय घेतला आहे. त्या धर्तीवर पुण्यातही केंद्र सुरू करावे, अशी मागणी करण्यात येत आहे.
मध्य रेल्वेच्या मुंबई विभागातील उपनगरीय मार्गांवर होणाऱ्या अपघातात वर्षाला हजारो जणांचा मृत्यू होतो, तर अनेकजण गंभीर जखमी होतात. या पार्श्वभूमीवर मुंबई हायकोर्टाने मध्य रेल्वेला रेल्वे स्टेशनवर आपत्कालीन परिस्थितीत प्रवाशांच्या सुरक्षिततेसाठी वैद्यकीय सेवा केंद्र सुरू करण्याचा आदेश दिला होता. त्यानुसार मध्य रेल्वेची मेन लाइनवरील कुर्ला, घाटकोपर, दिवा, मुलुंड, डोंबिवली, कल्याण, कर्जत आणि हार्बर लाइनवरील वडाला रोड व वाशी स्टेशन येथे ही केंद्रे सुरू करण्याचा निर्णय मध्य रेल्वे प्रशासनाने घेतला आहे. मुलुंड, कल्याण, डोंबिवली व वाशी येथील केंद्र डिसेंबर अखेरपर्यंत सुरू होण्याची चिन्हे आहेत. दादर, ठाणे व पनवेल या स्टेशनवर यापूर्वी प्रायोगिक तत्त्वावर ही सेवा काही महिन्यांपूर्वी दिली जात होती. त्यास चांगला प्रतिसाद मिळाला होता.
मध्य रेल्वेमध्ये मुंबई विभागाबरोबरच पुणे, नागपूर, सोलापूर आणि भुसावळ या विभागाचांही समावेश होतो. त्यामुळे वैद्यकीय सेवा केंद्रांची सुविधा फक्त मुंबई विभागातच का, अन्य विभागात ही सुविधा का नाही, असे प्रश्न प्रवासी उपस्थित करीत आहेत. पुणे विभागात सातारा, कराड, मिरज, कोल्हापूर, लोणावळा, खंडाळ्याचा घाट येथे अपघातांचे प्रमाण जास्त आहे. त्यामुळे पुणे स्टेशनसह दौंड-सोलापूर मार्गावरील महत्त्वाच्या जंक्शनवर अशा प्रकारची केंद्रे सुरू करण्याची आवश्यकता आहे.
पुणे स्टेशनवरील फूड प्लाजा दोन महिन्यांपासून बंद आहे. ती जागा वैद्यकीय सेवा केंद्रासाठी पुरेशी आहे. ती जागा आता वापराविना पडून आहे. त्या जागी वैद्यकीय सेवा केंद्र सुरू करणे शक्य आहे. 'पीपीपी' तत्त्वावर केंद्र सुरू करावयाचे असल्याने रेल्वेला जास्त पैसेही खर्च करावे लागणार नाहीत, असे मत रेल्वे प्रवासी ग्रुपच्या अध्यक्षा हर्षा शहा यांनी व्यक्त केले.
वैद्यकीय सेवा केंद्राची रचना
वैद्यकीय सेवा केंद्रे पब्लिक प्रायव्हेट पार्टनरशिप (पीपीपी) तत्त्वावर सुरू केली जाणार आहेत. ही सेवा २४ तासांसाठी असेल.
यामध्ये करारपद्धतीने ठराविक डॉक्टरची नेमणूक केली जाणार आहे. रेल्वे स्टेशन किंवा ट्रॅकवर काही दुर्घटना घडल्यास संबंधितांवर मोफत उपचार करण्याची जबाबदारी त्या डॉक्टरवर असेल. इतरवेळी त्या जागेत तो डॉक्टर खासगी प्रॅक्टिस करू शकणार आहे.
पुण्यातही दिवसाला सरासरी एकाचा रेल्वेतून पडून किंवा रेल्वेखाली चिरडून मृत्यू होत असल्याचे आकडेवारीवरून स्पष्ट होत आहे. तसेच, पुणे विभागाचा विचार करता हा मृत व जखमींचा आकाडा वाढण्याची शक्यता जास्त आहे. पुणे रेल्वे स्टेशन परिसरात रेल्वेचे हॉस्पिटल आहे. परंतु, ते कर्मचाऱ्यांसाठी आहे. त्यामुळे पुण्यातही वैद्यकीय सेवा केंद्र सुरू करण्याची गरज आहे.
- हर्षा शहा, अध्यक्ष, रेल्वे प्रवासी ग्रुप
पुणे रेल्वे स्टेशनच्या आवारात रेल्वेचे हॉस्पिटल आहे. धावत्या रेल्वेमध्ये एखाद्या प्रवाशाला काही त्रास झाल्यास किंवा रेल्वेच्या हद्दीत कोठे काही दुर्घटना घडल्यास स्टेशन व्यवस्थापकाकडून रेल्वे हॉस्पिटलमधील डॉक्टरांना पाचारण केले जाते. त्यांच्यामार्फत वैद्यकीय उपचार केले जातात. तसेच, अन्य ठिकाणी मदतीसाठी अॅम्ब्युलन्स पाठवली जाते.
- मनोज झंवर, जनसंपर्क अधिकारी, पुणे रेल्वे विभाग
मोबाइल अॅप डाउनलोड करा आणि राहा अपडेट
