भरधाव स्कूल व्हॅनच्या धडकेत पादचारी महिलेचा मृत्यू झाल्याची घटना पाषाण येथील रिलायन्स फ्रेशसमोर शनिवारी सकाळी घडली. या प्रकरणी चतुःश्रुंगी पोलिस ठाण्यात स्कूल व्हॅनचालकाविरोधात गुन्हा दाखल करून त्याला अटक करण्यात आली आहे.
सुंदराबाई शंकर मंजावकर (वय ५१, रा. सुतारवाडी, पाषाण) असे मृत्यू झालेल्या महिलेचे नाव आहे. याप्रकरणी मंदार महेश सुपेकर (वय २६, रा. बावधन) याला अटक करण्यात आली आहे. पोलिसांनी दिलेल्या माहितीनुसार, पाषाण येथील रिलायन्स फ्रेशसमोर मंजावकर या शनिवारी सकाळी अकराच्या सुमारास रस्ता ओलांडत होत्या. त्या वेळी भरधाव स्कूल व्हॅनने त्यांना धडक दिली. यामध्ये गंभीर जखमी होऊन त्यांचा मृत्यू झाला. सहायक पोलिस निरीक्षक एल. एम. नम अधिक तपास करत आहेत.
तरुणाला मारण्याचा प्रयत्न
बिबवेवाडी येथे पूर्ववैमनस्यातून एका तरुणावर तलवारीने वार करून जीवे मारण्याचा प्रयत्न केल्याची घटना शुक्रवारी रात्री घडली. या प्रकरणी बिबवेवाडी पोलिसांनी तिघांना अटक केली आहे. भिवा शिंदे (वय २५, रा. पवननगर चाळ, बिबवेवाडी) असे जखमीचे नाव आहे. त्याच्यावर खुनी हल्ला केल्याच्या आरोपावरून आकाश सिद्धराम गवंडी (वय २२), सिद्धराम भगवान गवंडी (वय ५१) आणि विकास सिद्धराम गवंडी (वय २०, रा. पवननगर चाळ, बिबवेवाडी) अशी अटक
केलेल्यांची नावे आहेत. पोलिसांनी दिलेल्या माहितीनुसार, शिंदे व आरोपी एकाच परिसरात राहण्यास आहेत. त्यांच्यात यापूर्वीदेखील भांडणे झाली होती. त्या भांडणाचा आरोपींच्या मनात राग होता. शुक्रवारी रात्री शिंदे यांच्या घरातील पाणी आरोपींच्या दारासमोर गेले. या कारणावरून आरोपींनी शिंदे यांना हाताने आणि तलवारीने वार करून जीवे मारण्याचा प्रयत्न केला. पोलिसांनी गुन्हा दाखल करत तिघांना अटक केली आहे. पोलिस उपनिरीक्षक सपकाळे अधिक तपास करत आहेत.
शिवाजीनगर येथे तरुणाला लुटले
हॉटेलमध्ये जेवण करून घरी निघालेल्या तरुणाला शिवाजीनगर येथील बँक ऑफ महाराष्ट्रसमोर लुटल्याची घटना शनिवारी मध्यरात्री घडली. या प्रकरणी तीन व्यक्तींविरोधात शिवाजीनगर पोलिस ठाण्यात जबरी चोरीचा गुन्हा दाखल करण्यात आला आहे. दलपत गुजर (वय २६, रा. ताडीवाला रोड) यांनी तक्रार दिली आहे. पोलिसांनी दिलेल्या माहितीनुसार, गुजर शिवाजीनगर परिसरातील एका हॉटेलमध्ये जेवण करण्यासाठी आले होते. जेवण केल्यानंतर रात्री साडेबारा ते एकच्या सुमारास शिवाजीनगर येथील बँक ऑफ महाराष्ट्रजवळ ते रिक्षाची वाट पाहत होते. त्या वेळी मोटारसायकलवरून आलेल्या तिघांनी त्यांना दमदाटी व मारहाण करून त्यांच्याजवळील तीस हजार रुपये लुटून नेले. या प्रकरणी त्यांनी शिवाजीनगर पोलिसांकडे तक्रार दिली आहे. पोलिस उपनिरीक्षक रामेकर अधिक तपास करत आहेत.
मोबाइल अॅप डाउनलोड करा आणि राहा अपडेट
