म. टा. प्रतिनिधी, पुणे
दप्तराचे ओझे कमी करण्याबाबत हाय कोर्टाने आणि राज्य सरकारने वारंवार इशारे दिल्यानंतरही, शहरातील जवळपास ७४ टक्के शाळांमधून त्याकडे दुर्लक्षच होत असल्याचे गुरुवारी उघड झाले. केवळ २६ टक्के शाळांमधूनच त्याची शंभर टक्के अंमलबजावणी होत आहे. त्यामुळेच हायकोर्टाच्या सूचनांचा आणि राज्य सरकारच्या आदेशाचा अवमान करणाऱ्या शाळांच्या मुख्याध्यापकांना नोटिसा बजावण्याचा निर्णय पुणे विभागीय शिक्षण उपसंचालकांनी गुरुवारी घेतला.
शालेय विद्यार्थ्यांच्या दप्तराच्या ओझ्याची समस्या दूर करण्यासाठी राज्य सरकारने स्वतंत्र शासन निर्णय काढत, दप्तराच्या वजनावर मर्यादा आणल्या आहेत. त्यानुसार विद्यार्थ्यांनी आपल्या शारीरिक वजनाच्या दहा टक्के वजनापर्यंतचे दप्तर शाळेमध्ये नेणे अपेक्षित आहे. हे ओझे कमी करण्यासाठी पालकांनी काळजी घेण्यासोबतच, शाळांमधून मुख्याध्यापकांनीही त्या विषयी जनजागृती करण्याची जबाबदारी सोपविण्यात आली आहे. या पूर्वी सरकारी पातळीवरून झालेल्या तपासणी मोहिमांमधून हे ओझे जास्तच असल्याचे आढळून आल्याने, ते कमी करण्यासाठी शाळांना सक्त सूचनाही करण्यात आल्या आहेत. त्यानंतरही शहरातील अनेक शाळांमधून ही दप्तराच्या ओझे मुलांच्या मानेवर कायमच असल्याचे गुरुवारी दिसून आले.
या विषयी पुणे विभागीय शिक्षण उपसंचालक रामचंद्र जाधव म्हणाले, 'आम्ही प्रातिनिधिक स्वरूपात शाळांमध्ये तपासणी मोहीम राबविली. दप्तराचे ओझे तपासण्यासाठी गुरुवारी अचानक ३८ शाळांमध्ये तपासणी मोहीम राबविली. त्यापैकी २६ टक्के शाळांमध्येच सरकारी निर्णयाची शंभर टक्के अंमलबजावणी आढळून आली. इतर सर्व शाळांमध्ये मुलांच्या दप्तराचे ओझे नियमापेक्षा जास्त दिसून आले. एकूण ३७८ विद्यार्थ्यांच्या दप्तरांपैकी २२२ विद्यार्थ्यांचे दप्तर निकषांप्रमाणेच आढळले. हे प्रमाण ५९ टक्के इतके आहे. दप्तराचे ओझे बाळगणाऱ्या विद्यार्थ्यांची एकूण संख्या १५६ असून, एकूण विद्यार्थ्यांच्या तुलनेत हे प्रमाण ४१ टक्के इतके आहे.'
'मुख्याध्यापकांना नोटिसा बजावणार'
दप्तराचे ओझे कायम असल्याचे आढळून आलेल्या शाळांच्या मुख्याध्यापकांना कारणे दाखवा नोटिसा बजावण्यात येणार आहेत. तसेच, संबंधित संस्थांच्या प्रतिनिधींनाही या विषयीची कल्पना दिली जाणार आहे. अशा शाळांकडून या पुढील काळात दप्तराचे ओझे कमी करण्यासाठी काय उपाययोजना केल्या जातील, या विषयीचे स्पष्टीकरणही मागविण्यात येणार असल्याचे जाधव यांनी सांगितले.
मोबाइल अॅप डाउनलोड करा आणि राहा अपडेट