एखाद्या इलेक्ट्रिक हार्डवेअर आणि सॉफ्टवेअरच्या मिलाफातून तब्बल चौदा तालवाद्ये वाजविण्याचा विक्रम पुण्यातील तबलावादक जयवंत उत्पात यांनी रविवारी केला. 'जयसॉनिक' या वाद्यावर चौदा तालवाद्यांची धून छेडत उत्पात यांनी उपस्थितांना मंत्रमुग्ध केले. हिंदी आणि मराठी गाण्यांसोबत त्यांनी सादर केलेला राग चारुकेशी उपस्थितांची दाद मिळवून गेला.
कोथरूड येथील बालशिक्षण मंदिराच्या सभागृहात हा कार्यक्रम झाला. डॉ. सोनल उत्पात, अनंतराव भोकरे आणि वेल विशर्स ग्रुप यांच्यातर्फे या कार्यक्रमाचे आयोजन करण्यात आले होते. 'दिन सारा गुजरा', 'याद किया दिल ने', 'जाने क्यो लोग मोहब्बत', 'ए मालिक तेरे बंदे हम' या प्रसिद्ध गाण्यांना उत्पात यांनी तालवाद्यांची सांगत केली. त्यासह 'रूप पाहता लोचनी' ही रचना आणि भजनांनी पुणेकरांना तालवाद्यांची आगळीवेगळी अनुभूती दिली. उत्पात यांनी 'जयसॉनिक' आणि तालवाद्यांतले साम्य दाखवून देण्यासाठी त्यांची तबला, ढोलकी, पखवाज व ढोलक या वाद्या सोबतची जुगलबंदीही सादर केली.
अत्याधुनिक सॉफ्टवेअर व हार्डवेअरच्या मिलाफातून ढोल, ढोलक, तबला, ढोलकी, पखवाज अशी किमान चौदा तालवाद्ये वाजवू शकणाऱ्या 'जयसॉनिक' या इलेक्ट्रॉनिक तालवाद्याची निर्मिती संगणक अभियंते व तबलावादक जयवंत उत्पात यांनी केली आहे. उत्पात हे उस्ताद अल्लारखा खाँ यांचे शिष्य आहेत. सर्व वाद्यांना जोडणारे एकच वाद्य तयार करण्याच्या दृष्टीने त्यांचा विचार सुरू होता. त्यातूनच या उपकरणाची निर्मिती केल्याचे; तसेच हे करत असताना देशी तालवाद्यांना धक्का लागणार नाही, याची काळजी घेतल्याचे उत्पात यांनी सांगितले. गोविंद भिलारे (पखवाज), चारुदत्त फडके (तबला), प्रशांत पांडव (ढोलक), निलेश पाठक (ढोलकी), सुनील जाधव (कीबोर्ड), प्रशांत पाठक (व्हायोलीन) यांनी वाद्यांची, तर पूर्णिमा दीक्षित व अरविंद देशपांडे यांनी गायनाची साथ केली. मंजिरी धामणकर यांनी निवेदन केले.
चौदा तालवाद्यांचा विक्रम
> तब्बल चौदा तालवाद्ये वाजविण्याचा विक्रम
> हिंदी, मराठी गाण्यांसोबत राग चारुकेशीलाही दाद
> 'दिन सारा गुजरा', 'याद किया दिल ने', 'जाने क्यो लोग मोहब्बत', 'ए मालिक तेरे बंदे हम' या प्रसिद्ध गाण्यांना तालवाद्यांची संगत
> तबला, ढोलकी, पखवाज व ढोलक या वाद्यांसोबतही जुगलबंदी
मोबाइल अॅप डाउनलोड करा आणि राहा अपडेट
