म. टा. प्रतिनिधी, पुणे
कोथरूड परिसरातून दोन महिन्यांच्या बाळाच्या अपहरणाचा गुन्हा अवघ्या काही तासांतच उघडकीस आणण्यात गुन्हे शाखेच्या पोलिसांना यश आले आहे. बाळाची आई आणि मावशी यांनी अपहरणाचा बनाव रचल्याचे समोर आले आहे. दोन लाख रुपयांसाठी आईनेच स्वतःचे बाळ बहिणीकडे औरंगाबादला सुपूर्द केले होते. खंडणी विरोधी पथकाने कौशल्यपूर्वक तपास करून गुन्हा उघडकीस आणला आहे. या प्रकरणी बाळाची आई आणि मावशीला ताब्यात घेण्यात आले आहे.
अर्चना मुकेश सोनवणे (वय २६, रा. कोथरूड) असे आईचे आणि सविता सोनाजी संकपाळ (वय २८, रा. मुकुंदवाडी, स्टेशनजवळस सिडको, संभाजीनगर) असे मावशीचे नाव आहे. पौड रस्त्यावर गुरुवारी दुपारी साडेबाराच्या सुमारास अर्चना या मुलास शाळेत सोडण्यासाठी बाळाला घेऊन जात होत्या. त्यावेळी मोटारीतून आलेल्या चौघांनी आपल्या हातातील बाळ हिसकावून पळवून नेल्याची तक्रार त्यांनी कोथरूड पोलिस ठाण्यात नोंदवली.
गुन्हे शाखेचे अतिरिक्त पोलिस आयुक्त सी. एच. वाकडे यांच्या आदेशानुसार गुन्हे शाखेच्या पोलिसांनी घटनास्थळी धाव घेऊन तपास सुरू केला. घटनास्थळाची पाहणी करण्यात आली. अर्चना हिच्याकडे चौकशी केल्यानंतर तिच्या बोलण्यात विसंगती आढळून आली. त्यामुळे हा काही तरी वेगळाच प्रकार असल्याच पोलिसांचा संशय बळावला. तसेच, बाळाची मावशी सविता ही पुण्यात येऊन गेल्याची माहिती अर्चनाने लपवली. त्यामुळे खंडणी विरोधी पथकाचे पोलिस निरीक्षक अनिल पाटील यांनी सहायक पोलिस निरीक्षक विठ्ठल शेलार यांच्या पथकाला तत्काळ औरंगाबाद येथे बाळाच्या शोधासाठी पाठविले.
या पथकाने औरंगाबाद येथे जाऊन सविताचा शोध घेतला. त्यावेळी अर्चना हिनेच आपल्याला बाळ सांभाळण्यासाठी दिल्याचे तिने सांगितले. सविताने तिच्या ओळखीच्या भीमा कोरे नावाच्या व्यक्तीकडे बाळाला ठेवले होते. पोलिसांनी त्याच्याकडून बाळ ताब्यात घेतले. त्यानंतर सविता आणि अर्चन यांची अधिक चौकशी केली असता, हा प्रकार बनाव असल्याचे उघड झाले. अशी माहिती गुन्हे शाखेचे पोलिस उपायुक्त पी. आर. पाटील आणि सहायक पोलिस आयुक्त राजेंद्र जोशी यांनी दिली.
अर्चना यांचे पती छोटी-मोठी कॉन्ट्रक्टची कामे करतात. मात्र, त्यांच्यात पटत नसल्यामुळे अर्चना वेगळी राहणार होती. तिच्या बहिणीला आधीच दोन मुली असल्यामुळे त्यांना मुलगा दत्तक हवा होता. पण, मुकेश सोनवणेंचा बाळ दत्तक देण्यास विरोध होता. म्हणूनच अर्चनाने बहिणीला पुण्यात बोलावून बाळ तिच्या ताब्यात दिले. त्या बदल्यात सविता अर्चनाला दोन लाख रुपये देणार होती.
आईच्या चेहऱ्यावर भीतीचा लवलेशही नाही
बाळाचे अपहरण झाल्यानंतर एखाद्या आईची किती गंभीर अवस्था होऊ शकते, याची कोणालाही कल्पना येऊ शकते. मात्र, अर्चना यांच्या चेहऱ्यावर बाळ हरवल्याचे दुःख दिसत नव्हते. पोलिसांनी विचारलेल्या प्रश्नांना ती व्यवस्थित उत्तरे देत होती. त्यामुळे पोलिसांचा तिच्यावरच संशय बळावला. तिच्याकडे चौकशी केल्यानंतर बोलण्यातही विसंगती आढळून आली. त्यामुळे अधिक तपास केल्यानंतर बाळाच्या अपहरणाचा बनाव रचल्याचे समोर आले.
मोबाइल अॅप डाउनलोड करा आणि राहा अपडेट
