वयात येत असलेल्या मुला मुलींमध्ये शारीरिक बदल होत असताना मेदपेशींमुळे लठ्ठपणा वाढतो. वाढत्या वयात वाढणाऱ्या पोटाच्या घेरामुळे 'टीनएजर्स'च्या पालकांना टेन्शन आले आहे. परिणामी हे पालक बॅरिअॅट्रिक सजर्नकडे धाव घेऊ लागले आहेत. तर दुसरीकडे शाळा, कॉलेज ते सोसायटी आणि घरापांसून ते मित्रांपर्यंत सर्व जण लठ्ठपणावरून टिंगल करीत असल्याने १८ टक्के प्रौढ मुलेमुली नैराश्याने घेरले जात असल्याचे समोर आले आहे. 'जागतिक लठ्ठपणा विरोधीदिना'च्या पार्श्वभूमीवर, लठ्ठ मुलामुलींमध्ये काही आजार वाढत असल्याची माहिती काही बॅरिअॅट्रिक सर्जन्सनी 'मटा'ला दिली.
लठ्ठपणाच्या आजाराबाबत सामान्यांसह डॉक्टरांमध्ये फारशी जनजागृती नाही. लठ्ठपणा हा आजार आहे, हेच पटवून देण्याची गरज आहे. लहानपणी गुटगुटीत दिसणारी मुले-मुली वयात येताना जाडजूड होतात. त्या वेळी त्यांच्यामध्ये मानसिक, शारीरिक बदल घडतात. चिडखोरपणा, वागणे बदलते. शरीरातील मेदपेशी वाढल्याने मुलामुलींमध्ये लठ्ठपणा वाढतो. ११ ते २५ वयातील मुलामुलींमध्ये लठ्ठपणाचे ३० ते ३५ टक्के प्रमाण आहे. लठ्ठपणामुळे त्यांना सर्वत्र चिडविले जाते आणि परिणामी त्यांना नैराश्य येते. मुलांना नैराश्य येत असल्याने मुलांची काळजी वाटून पालकांनाही ताण येतो,' अशी माहिती बॅरिअॅट्रिक सर्जन डॉ. जयश्री तोडकर यांनी दिली.
लठ्ठपणामुळे थायरॉइड, लैंगिक तसेच शारीरिक अन्य नैसर्गिक विकास प्रक्रिया खुंटते. जाड दिसत असल्याने ही मुले-मुली इतरांमध्ये फारशी मिसळत नाहीत. त्यामुळे त्यांच्यात एकटेपणा वाढतो, याकडेही त्यांनी लक्ष वेधले.
'शाळा, कॉलेजच्या मुलांमधील 'टाइप टू' डायबेटिसचे प्रमाण दोनवरून नऊ टक्क्यांवर वाढले आहे. लठ्ठपणामुळे मुलींमध्ये वंध्यत्व येण्याचा धोका असतो. शिक्षकांपासून ते पालकांपर्यंत आणि सोसायट्यांपासून ते सरकारपर्यंत प्रत्येकाने लठ्ठपणा विरोधी उपक्रम राबविले पाहिजे. त्यामुळे वेळीच लठ्ठपणाचे प्रमाण कमी होईल,' असे मत बॅरिअॅट्रिक सर्जन डॉ. शशांक शहा यांनी व्यक्त केले.
लठ्ठपणामुळे सातत्याने चिडविणे, चुकीच्या कमेंट्स, टार्गेट करणे यामुळे मुलांमध्ये नकारात्मकता वाढते. त्यातून नैराश्य येते. लठ्ठ व्यक्तींमध्ये काही हार्मोन्सचे प्रमाण अधिक असते. मेंदूतील रासायनिक बदलामुळे मुलांना नैराश्य येते आणि त्यांच्यात न्यूनगंड तयार होतो.
- डॉ. स्वप्नील देशमुख, मानसोपचार तज्ज्ञ
मोबाइल अॅप डाउनलोड करा आणि राहा अपडेट
