म. टा. प्रतिनिधी, पिंपरी
लष्कराने बंद केलेला पिंपळे सौदागर येथील रक्षक चौक ते कुंजीर वस्ती या जुन्या रस्त्याऐवजी पर्यायी रस्ता वापरण्यास स्थानिक नागरिकांनी विरोध दर्शविला आहे. 'जुना रस्ताच वाहतुकीसाठी खुला करण्यात यावा,' अशी येथील नागरिकांची मागणी आहे. त्यासाठी लढा उभारला असून, रविवारी (२२ नोव्हेंबर) परिसरातील सोसायटींमधील नागरिक एकत्र झाले होते. रक्षक रोड बचाव समितीने आयोजित केलेल्या बैठकीला खासदार श्रीरंग बारणे हे देखील उपस्थित होते. संरक्षणमंत्री मनोहर पर्रीकर यांनी जुना रस्ता खुला होऊ शकणार नसल्याचे स्पष्ट केल्याचे बारणे यानी या वेळी सांगितले. मात्र, पर्यायी रस्त्यासाठी अन्य पर्याय शोधण्यासाठी प्रयत्न करणार असल्याचेही ते या वेळी म्हणाले.
स्थानिकांनी बैठक आयोजित केल्याचे समजल्यावर खासदार बारणे यांच्यासह माजी नगरसेवक नाना काटे, संदीप काटे, कल्याण काटे हे बैठकीला आर्वजून उपस्थित राहिले. रक्षक रोड बचाव समितीचे संतोष गंभीरे, मिलिंद महाजन, दीपक गांगुर्डे, राजू शेलार, अतुल कुंटेकर, कैलास कुलकर्णी, दिलीप दलाल, दिलीप ठाकूर, बलविंदर सिंग, अमोल केवटे, विकास कुमार, अरूण कोकाटे, कांचण पेत, अंकित मारू व विविध सोसायट्यांतील नागरिक मोठ्या संख्येने उपस्थित होते.
या वेळी रक्षक रोड बचाव समितीचे गंभीरे म्हणाले, 'संरक्षण विभागाने येथील नागरिकांना वापरण्यासाठी देऊ केलेल्या जिंजर सोसायटी ते साई चौक या पर्यायी रस्त्याचा येथील नागरिकांना काहीच फायदा होणार नाही. या रस्त्यामुळे येथील विद्यार्थ्यांना शाळेत जायला एक तास उशीर होत आहे. त्यामुळे कुंजीर वस्ती ते रक्षक चौक हा जुना रस्ताच खुला करण्यात यावा. हा रस्ता मिळेपर्यंत सोशल मीडियाच्या माध्यमातून शांततेच्या मार्गाने आंदोलन सुरूच ठेवणार आहे.' खासदार बारणे यांनी सरंक्षण विभागाने बंद केलेला कुंजीर वस्ती ते रक्षक चौक हा रस्ता चालू होऊ शकत नसल्याचे स्पष्ट केले. लोकांच्या समस्यांची जाणीव आहे. लोकांच्या सुविधांसाठी निश्चितच योग्य पर्यायी रस्ता काढू.
ग्रेडसेप्रेटर, सब-वे व अन्य पर्यायही सुचवला जाईल. तसेच, पंधरा दिवसांच्या आत महापालिका आयुक्तांशी बोलून काही उपाय नक्की काढू असेही ते म्हणाले. काही ठरावीक लोक कोर्टात गेल्याने हा रस्ता बंद करावा लागत असल्याचे पर्रीकर यांनी स्पष्ट केल्याचे बारणे यांनी सांगितले. माजी नगरसेवक नाना काटे यांनी या रस्ता बंद झाल्याबाबत नाराजी व्यक्त केली. नगरसेवक शत्रुघ्न काटे यांनी कोर्टात जाण्यामागची कारणे आरोप करणाऱ्यांनी समजून घ्यावीत, असे 'मटा'शी बोलताना सांगितले. तत्कालीन महानगरपालिका आयुक्त डॉ. श्रीकर परदेशी यांनी सूचित केल्यामुळेच कोर्टात गेल्याचे काटे म्हणाले.
'किमान स्कूल बस, अॅम्ब्युलन्स तरी सोडा'
जुना रस्ता खुला होऊ शकणार नसल्याचे संरक्षणमंत्री मनोहर पर्रीकर यांनी सांगितल्यानंतर नागरिकांनी किमान स्कूल बस आणि अॅम्ब्युलन्स, अग्निशामनदलाची गाडी तरी येथून सोडावी, अशी मागणी खासदार श्रीरंग बारणे यांच्याकडे केली आहे.
मोबाइल अॅप डाउनलोड करा आणि राहा अपडेट
