प्लॅटफॉर्म तिकिटाच्या रकमेत बचत करण्यासाठी लोकलचे स्वस्त तिकीट काढणाऱ्यांना धडा शिकविण्यासाठी रेल्वे प्रशासनाने एक अजब उपाय शोधून काढला आहे. उद्यापासून (शुक्रवार) लोकलच्या तिकीटातही वाढ करण्यात आली असून आता लोकलसाठी किमान पाचऐवजी दहा रुपये मोजावे लागणार आहेत. मूठभर लोकांना धडा शिकविण्यासाठी रेल्वेने तिकीट वाढवून हजारो प्रवाशांवर अन्याय केल्याची भावना प्रवाशांमध्ये आहे.
रेल्वेचा हा नवीन तिकीटदर उद्या, शुक्रवारपासून लागू होणार आहे. फ्लॅटफॉर्म तिकीटधारक व एखाद्या रेल्वेचे किंवा लोकलचे तिकीटधारक रेल्वे स्टेशनवर अधिकृतपणे प्रवेश करू शकतात. प्रवाशांना सोडण्यासाठी त्यांचे नातेवाइक मोठ्या संख्येने स्टेशनवर येतात. त्यासाठी फ्लॅटफॉर्म तिकीट बंधनकारक आहे. अन्यथा, विना तिकीट प्रवेश केल्याबद्दल 'टीसी'कडून दंड आकारण्यात येतो. पूर्वी फ्लॅटफॉर्म तिकीटाचा दर पाच रुपये होता. मात्र, काही महिन्यांपूर्वी या तिकिटाचा दर १० रुपये करण्यात आला आहे. तेव्हापासून स्टेशनमध्ये प्रवेश करण्यासाठी अनेकजण फ्लॅटफॉर्म तिकिटाऐवजी लोकलचे जवळच्या स्टेशनचे पाच रुपयांचे तिकीट काढत असल्याचे अनेकदा समोर आले. या तिकिटावरही काही तास स्टेशनवर थांबता येते. त्यामुळे रेल्वेने या तिकिटाच्याही दरवाढीचा निर्णय घेतला.
दैनंदिन कामासाठी स्टेशनवर येणारे आणि तिकीट काढण्याच्या ठिकाणाहून दोन ते तीन स्टेशनपुढे प्रवास करणाऱ्यांना याचा फटका बसणार आहे; तसेच लोकलच्या पासेसमध्येही वाढ होण्याची शक्यता आहे. मात्र, यामुळे रेल्वेच्या उत्पन्नात कोट्यवधींची वाढ होणार आहे. दरम्यान, कमी अंतर प्रवास करणाऱ्यांना या निर्णयामुळे पाच रुपये जादा मोजावे लागणार आहे. ही एकप्रकारे भाडेवाढच आहे, असे मत रेल्वे प्रवासी ग्रुपच्या अध्यक्षा हर्षा शहा यांनी व्यक्त केले.
लोकलचे तिकीट कमी असल्याचा फायदा घेत अनेक प्रवासी फसवणूक करीत होते. त्यामुळे या दोन्ही तिकिटातील फरक दूर करण्यासाठी हा निर्णय घेतला आहे. आता लोकलचे पाच रुपयांचे तिकीट दहा रुपये होणार आहे. त्यापुढील तिकीटांची रक्कम कायम राहणार आहे.
- मनोज झंवर, जनसंपर्क अधिकारी, मध्य रेल्वे
मोबाइल अॅप डाउनलोड करा आणि राहा अपडेट