Mustafa.Attar@timesgroup.com । पुणे
खव्यापासून ते दुधापर्यंत, मिठाईपासून ते खाद्यपदार्थांपर्यंत, कपड्यांपासून ते घरासह दैनंदिन जीवनात वापरल्या जाणाऱ्या अथवा गरजेच्या प्रत्येक वस्तू खरेदी करताना गुणवत्तेचा आग्रह धरला जातो. पण आता व्हिस्की, रम, व्होडका, ब्रॅन्डी अशा दारूच्या प्रकारांमध्ये शिसे, पारा (मर्क्युरी), तांबे, अर्सेनिक कॅडमियम, इथिल अल्कोहोल, मिथाइल अल्कोहोल या आरोग्यास घातक घटकांच्या वापराकडे 'एफडीए'ने मोहरा वळविला आहे. केंद्र सरकारने तयार केलेले दारूच्या गुणवत्तेचे निकष पाळणे उत्पादकांना बंधनकारक ठरणार आहेत.
केंद्र सरकारच्या 'फूड सेफ्टी स्टँडर्ड अॅथॉरिटी ऑफ इंडिया' (एफएसएसएआय) अर्थात अन्न सुरक्षा कायद्यातील नव्या तरतुदींमुळे अन्न व औषध प्रशासनाची (एफडीए) दारूच्या उत्पादनावर करडी नजर राहणार आहे. मद्याचा पूर्वी अल्होकोल प्रकारात समावेश होता. अन्नपदार्थात त्याचा समावेश नव्हता. त्या वेळी अन्न भेसळ प्रतिबंधक १९५४ कायद्यांतर्गत दारूवर नियंत्रण ठेवले जात होते. परंतु, त्या कायद्यात मर्यादा असल्याने उत्पादन व विक्रीव्यवस्थेवर फारशी कारवाई करता येत नसे. दारूमध्ये वापरण्यात येणाऱ्या विविध घटकांचे प्रमाण किती असावे, हे निश्चित नव्हते. त्यामुळे विविध उत्पादनांमधील या घटकांचे प्रमाण कमीजास्त होते.
देशात अन्न सुरक्षा कायदा लागू झाल्यामुळे अन्नपदार्थाच्या व्याख्येत बीअर, वाईन, व्होडका, रम, व्हिस्की, जीन, ब्रॅन्डी यांचाही समावेश झाला. त्यामुळे दारुच्या निर्मितीत या घटकांचे प्रमाण निश्चित केले आहे. या प्रस्तावावर ३० डिसेंबरपर्यंत हरकती, सूचना मागविण्यात आल्या आहेत.
दारूमध्ये अर्सेनिक, शिश्याचा वापर
वाइन, जीन, बिअर्स, व्हिस्कीसारख्या दारुमध्ये अर्सेनिक धातू, इथिल अल्कोहोल, शिसे, पारा, कॅडमिअम, तांबे, मिथील अल्कोहोल, व्होटाइल अॅसिडसारख्या घटकांचे प्रमाण निश्चित झाले आहे. त्याकरिता दारूचे नमुने घेऊन 'एफडीए'चे अधिकारी त्यांचा दर्जा तपासणार आहेत. त्यासाठी दारूविक्रेत्यांपासून ते उत्पादकांपर्यंत सर्वानाच 'एफडीए'चा परवाना घ्यावा लागेल.
कोणत्याही प्रकारची देशी अथवा इंग्रजी दारू, ही वाईटच असते. त्याचा शरीरावर परिणाम होतो. देशी दारूचा थेट, तर इंग्रजी दारूचा हळूहळू परिणाम होतो. दारूने शरीराचे नुकसान होत असते. शरीराची शक्ती संपली तर दारूचे होत असलेले दुष्परिणाम थेट दिसून येतात.' - डॉ. अनिल अवचट, संचालक, मुक्तांगण व्यसनमुक्ती केंद्र
'आतड्याचा आणि लिव्हरचा कर्करोग दारूमुळे होतो. दारू आणि तंबाखूचे प्रमाण अधिक असेल तर कर्करोग अधिक प्रमाणात वाढतो. दारूमुळे हृदयरोगही होऊ शकतो.' - डॉ. विनोद गोरे, कॅन्सरतज्ज्ञ
मोबाइल अॅप डाउनलोड करा आणि राहा अपडेट