व्हॉट्सअॅप, सोशल मीडियावरून शुभेच्छांचा वर्षाव
म. टा. प्रतिनिधी, पुणे
'रांगोळीच्या सप्तरंगात सुखाचे दीप उजळू दे, लक्ष्मीच्या पावलांनी घर सुखसमृध्दीने भरू दे', 'दीपावलीच्या शुभ क्षणांनी आपली सारी स्वप्ने साकार व्हावी, ही दिवाळी आपल्यासाठी एक अनमोल आठवण ठरावी...आणि त्या आठवणीने आपलं आयुष्य अधिकाधिक सुंदर व्हावं...',दिवाळीच्या अर्थात प्रकाशसणाच्या शुभेच्छा देण्यासाठी अशा आशयाचे शेकडो मेसेजेस व्हॉटसअॅप आणि अन्य सोशल मीडियाच्या माध्यमातून पाठविण्यात येत आहेत. अशा अनेक मेसेजेससोबत पणत्यांचे, दिव्यांचे, कंदिलांचे, फटाक्यांचे फोटो तसेच अनेक भन्नाट व्हिडिओही शेअर करण्यात येत आहेत.
प्रकाशाच्या या उत्सवात कृत्रिम रोषणाईने सर्व परिसर उजळून गेला आहे, आणि मातीच्या पणत्यांवरही डेकोरेशनचा साज चढला आहे. त्यावर भाष्य करणारा 'भड़किले-बनावटी रौशनी की आदत से मजबूर.... हम माटीके दिये तो भूल ही गए हैं...चलो नन्ही रोशनियों को संवारते हैं...दिवाली की शुभकामनांए...' हा हिंदी मेसेजही सर्वांना अंर्तमुख करणारा आहे.
'धनलक्ष्मी, धान्यलक्ष्मी, धैर्यलक्ष्मी, शौर्यलक्ष्मी, विद्यालक्ष्मी, कार्यलक्ष्मी, विजयालक्ष्मी, राजलक्ष्मी..! या दीपावलीत या अष्टलक्ष्मी तुमच्यावर धनाचा वर्षाव करोत...दिवाळीच्या लक्ष लक्ष शुभेच्छा,' अशा संदेशांतून दिवाळी आणि लक्ष्मीचे नाते उलगडण्याचा प्रयत्न केला जात आहे. दीपावलीचा हा सण आपणा सर्वांना माणूस म्हणूनही जवळ आणणारा असतो. त्याचाच आधार घेत 'तुमच्या सारख्या चांगल्या माणसांची एक साखळी तयार व्हावी...आपण कधी भेटू अगर न भेटू, पण आपले चांगले विचार नेहमी एकमेकांना नक्की भेटत राहतील ..माझी माणसं हीच माझी श्रीमंती..! लोक म्हणतात जगण्यासाठी पैसा लागतो, अहो पैसा तर व्यवहारासाठी लागतो..!! जगण्यासाठी लागतात फक्त प्रेमाची माणसं, अगदी तुमच्यासारखी. तुम्हाला दिवाळीच्या शुभेच्छा,' असा मेसेजही अनेकांकडून फॉरवर्ड होत आहे.
दिवाळी हा उजेडाचा, आनंदाचा क्षण! आणि तो बळीराजाची आठवण काढण्याचाही दिवस! इडा पिडा टाळूया, बळीचे राज्य आणूया! सर्वांना दीपावलीच्या खूप खूप शुभेच्छा, असे म्हणत सध्या दुष्काळाचा सामना करणाऱ्या बळीराजाची आठवणही अनेकांनी ठेवली आहे. दिवाळी म्हणजे वसुबारस, धनत्रयोदशी, नरकचतुर्दशी, लक्ष्मीपूजन, पाडवा आणि भाऊबीज या प्रत्येक दिवसाचे महत्त्व सांगणारा एक काहीसा मोठा मेसजेही फॉरवर्डमध्ये आघाडीवर आहे. त्यातच यंदा या प्रत्येक दिवसाचे महत्त्व सांगणारा एक स्वतंत्र मेसेज प्रत्येक दिवशी पाठविण्याचा नवा ट्रेंड आहे. दररोज सकाळी सकाळी त्या दिवसाचे महत्त्व उलगडणारा मेसेज पाठवून नव्या पिढीला या दिवसांचे महत्त्व सांगण्यात येत आहे. या दिवसाशी संबंधित चारोळ्याही अनेकांनी केल्या आहेत.
त्याचबरोबर ही दीपावली आपणास आनंदाची, भरभराटीची, सुख समृद्धीची आणि यशस्वितेची आणि मुख्य म्हणजे तुम्हाला हवी तशी जावो, असा एक मेसेजही काहीसा वेगळा आणि आनंद देणारा ठरत आहे.
कर्ता करविता गुलदस्त्यातच...
ई-मेल, मेसेजिंग आणि व्हॉट्सअॅपमुळे फॉरवर्डचा जमाना सुरू झाला आहे. अर्थात त्यामुळे सर्जनशीलतेलाही मोठा वाव मिळाला आहे. परंतु, त्यामुळेच आला चांगला मेसेज की कर फॉरवर्ड, असा ट्रेंड जोरात आहे. चांगला मेसेज क्षणात डझनभर ग्रुपवर शेअर केला जातो. परंतु, त्यात लेखकाचे, कवीचे नाव नसते. परिणामी, या चांगल्या मेसेजचा कर्ता करविता कोण, हे मात्र, गुलदस्त्यातच राहते.
मोबाइल अॅप डाउनलोड करा आणि राहा अपडेट
