मावळ तालुक्यातील पवन मावळातील कोथुर्णे गावात किरकोळ कारण, तसेच राजकीय पार्श्वभूमीतून २५ ते ३० जणांच्या टोळक्याने गावातीलच दलित वस्तीवर हल्ला करून धुडगूस घातला. शुक्रवारी रात्री पावणे नऊच्या दरम्यान ही घटना घडली.
सचिन दत्तू दळवी, शेखर मारुती दळवी, सोपान ज्ञानेश्वर दळवी, सूर्यकांत सतू दळवी, चंद्रकांत दत्तू दळवी, आकाश प्रकाश दळवी, दत्तू नारायण दळवी, भाऊ बाबू दळवी, वाघू येसु दळवी, सतीश राजाराम लोयरे, सचिन तुकाराम दळवी, सुनील तुकाराम कुंभार, काळू नथू दळवी, विठ्ठल बाळू दळवी, एकनाथ निंबळे, नंदू सतू दळवी, चंद्रकांत नथू दळवी, राजेश ज्ञानेश्वर दळवी, प्रवीण भाऊ दळवी, गणपत नारायण दळवी, स्वप्नील विठ्ठल दळवी, भगवान तुकाराम दळवी, दत्तू राजाराम लोयरे, नितीन शंकर दळवी, मास खान, योगेश वाघू दळवी, नितीन तुकाराम दळवी, विठ्ठल बाळू दळवी (सर्व रा. कोथुर्णे, ता. मावळ) यांच्या विरोधात गुन्हा दाखल करण्यात आला आहे. या प्रकरणी महिंद्र नाना सोनवणे (वय ४६, रा. समतानगर, कोथुर्णे, ता. मावळ) यांनी फिर्याद दिली.
कामशेत पोलिसांनी दिलेल्या माहितीनुसार, कोथुर्णे येथे नवरात्रीनिमित्त शुक्रवारी सायंकाळी साडेसहाच्या सुमारास देवीची मिरवणूक काढण्यात आली होती. या वेळी महेंद्र सोनवणे हे कामावरून घरी जात होते. वाटेत मिरवणूक असल्याने त्यांची दुचाकी रस्त्याच्या बाजूला करून ते उभे राहिले होते. या वेळी मिरवणुकीत नाचणाऱ्या सचिन दत्तू दळवी हा सोनावणे यांच्याजवळ गेला व त्याला दुचाकीवरून खाली ओढत कपडे फाडून त्यांना मारहाण केली. त्यानंतर सोनवणे यांचे पुतणे पोलिस ठाण्यात तक्रार देण्यासाठी जात असल्याची माहिती वरील तरुणांना मिळाली. त्यांनी अचानक दलित वस्तीतील सोनवणे यांच्या घरासह शेजारच्या घरांवर हल्ला करत धुडकूस घातला. घरातील महिला, पुरुषांना जातीवाचक शिवीगाळ केली. टोळक्याने महिलांच्या अंगावरील सोन्या-चांदीचे दागिने व घरातील रोख रक्कम लंपास केल्याचे सोनावणे यांनी फिर्यादीत म्हटले आहे. या प्रकरणाचा पुढील तपास लोणावळा उपविभागीय पोलिस अधिकारी विनायक ढाकणे करत आहेत.
मोबाइल अॅप डाउनलोड करा आणि राहा अपडेट
