दिल्ली हायकोर्टाच्या आदेशानंतर सॅमसंग कंपनीचे बनावट अथवा ग्रे-मार्केटमधील मोबाइल आणि अॅक्सेसरीज विक्री करणाऱ्या पिंपरी कॅम्पमधील अकरा दुकानांवर छापा टाकण्यात आला. या छाप्यामध्ये सुमारे एक लाख मोबाइल अॅक्सेसरीज सील करण्यात आल्या असून, यामध्ये २० मोबाइल सेटचा समावेश आहे.
हायकोर्टाने गठीत केलेल्या आठ 'हायकोर्ट कमिशनर' आणि शंभर पोलिसांच्या फौजफाट्यासह पिंपरी कॅम्प आणि पुण्यातील बुधवारपेठ तसेच शिवाजीनगर परिसरात बुधवारी (१४ ऑक्टोबर) हे छापासत्र राबविण्यात आले. विशेष म्हणजे पुणे, पिंपरी-चिंचवडमध्ये ज्यावेळेस छापासत्र सुरू होते. तेव्हाच दिल्ली येथील काही भागात देखील ही कारवाई सुरू होती.
सॅमसंग कंपनीने भारतभरात कंपनीच्या नावाने मोबाइल आणि अॅक्सेसरीजची मोठ्या प्रमाणात विक्री सुरू केल्याबाबत दिल्ली हायकोर्टात याचिका दाखल केली होती. त्यावर कोर्टाने नेमलेल्या एका विशेष पथकाने भारतभरात छुप्या पद्धतीने पाहणी करून एक अहवाल कोर्टात सादर केला होता. यामध्ये पिंपरी कॅम्प परिसरातील अकरा दुकानांची नावे-पत्ता होते. तसेच, पुण्यासह दिल्लीतील देखील दुकानांचा नाव-पत्ते होते. कारवाईसाठी हायकोर्टाने आठ कोर्ट कमिश्नरची नेमणूक केली.
बुधवारी सकाळी मुख्य हायकोर्ट कमिश्नर अॅड. सचिन पुरी यांच्यासह त्यांचे सात सहकारी कमिश्नर पुण्यात दाखल झाले. त्यांनी पुणे पोलिस आयुक्तांची भेट घेतली. एकाचवेळेस कारवाई करायची असल्याने फौजफाट्याची मागणी केली. त्यानंतर तत्काळ पोलिस आयुक्तांनी आठ पोलिस निरीक्षक आणि ९२ अधिकारी-कर्मचाऱ्यांची टीम कारवाईसाठी नेमली. त्यानंतर दुपारी दीड वाजण्याच्या सुमारास एकाच वेळेस कारवाईला सुरुवात झाली. या वेळई सुरुवातीच्या दहा दुकानांमधील हॅण्डसफ्री, चार्जर, कव्हर, बंपर आदी स्वरूपाचे सुमारे एक लाख अॅक्सेसरीज सील केल्या. त्यानंतर अकराव्या दुकानात या पथकाने २० मोबाइल सील केले.
मोबाइल अॅप डाउनलोड करा आणि राहा अपडेट