म. टा. प्रतिनिधी, पुणे
फिल्म अँड टेलिव्हिजन इन्स्टिट्यूट ऑफ इंडियातील विद्यार्थ्यांचा गेल्या तीन महिन्यांपासून संप सुरू असताना, आता चित्रपट आणि टीव्ही मालिकांशी संबंधित अडीच लाख कलाकार-तंत्रज्ञही बेमुदत संपावर गेले आहेत. कलावंत-तंत्रज्ञांसाठी कार्यरत असलेल्या फेडरेशन ऑफ वेस्टर्न इंडिया सिने एम्प्लॉइजच्या मागण्या निर्मात्यांच्या संघटनांना मान्य नसल्याने हा संप सुरू झाला असून, चित्रपट व मालिकांची चित्रीकरणे तीन ऑक्टोबरपासून ठप्प होणार आहेत.
फेडरेशन ऑफ वेस्टर्न इंडिया सिने एम्प्लॉइजचे अध्यक्ष कमलेश पांडे यांनी 'मटा'ला याबाबत माहिती दिली. चित्रपट, टीव्ही मालिकांच्या निर्मात्यांची असोसिएशन (इम्पा, प्रोड्यूसर्स गिल्ड) आणि फेडरेशन ऑफ वेस्टर्न इंडिया सिने एम्प्लॉइज (एफडब्ल्यूआयसीए) या दोन संस्थांमध्ये दर पाच वर्षांनी करार केला जातो. त्यात कलाकार-तंत्रज्ञांचे मानधन, आरोग्य योजनांसंदर्भात नियम ठरवले जातात. यापूर्वी २०१०मध्ये करण्यात आलेला करार अलीकडेच संपुष्टात आला. त्यामुळे नवीन करार केला जाणार आहे. नव्या करारासाठी निर्मात्यांच्या असोसिएशनने केलेल्या चर्चेत काहीच समाधानकारक बाबी नव्हत्या. त्यामुळे एफडब्ल्यूआयसीएने या सर्व कलाकार तंत्रज्ञांच्या कल्याणाचा विचार असलेला कराराचा मसुदा १६ मार्चला निर्मात्यांच्या असोसिएशनकडे पाठवला. मात्र, वारंवार आठवण करूनही त्यांच्याकडून काहीच प्रतिसाद आला नाही. त्यामुळे एफडब्ल्यूआयसीएने एक ऑक्टोबरपासून बेमुदत संपाची हाक दिली असून, तीन ऑक्टोबरपासून सर्व चित्रीकरणे थांबणार आहेत.
'करार करण्यावरून सुरू असलेल्या वादामुळे सहा मेपासून संप करण्यात येणार होता. त्या वेळी निर्मात्यांकडून मानधनात १३ टक्के वाढ मान्य करण्यात आल्यावर संप मागे घेण्यात आला. मात्र, आता परिस्थिती वेगळी आहे. वारंवार लक्ष वेधूनही करार, मागण्यांचा निर्मात्यांकडून विचार केला जात नाही. त्यामुळे बेमुदत संप करण्यावाचून पर्याय उरलेला नाही,' असे पांडे यांनी सांगितले.
मोबाइल अॅप डाउनलोड करा आणि राहा अपडेट
