म. टा. प्रतिनिधी, पुणे
फिल्म अँड टेलिव्हिजन इन्स्टिट्यूट ऑफ इंडियाचे (एफटीआयआय) संपकरी विद्यार्थी व केंद्र सरकारच्या माहिती आणि प्रसारण मंत्रालयाचे प्रतिनिधी यांच्यामध्ये सातत्याने फक्त बोलणी होत असल्याने, या चर्चेला आता चर्चासत्राचे रूप येऊ लागले आहे. मुंबईत गुरुवारी झालेल्या बैठकीतही केवळ चर्चाच झाली.
आता पुढील बैठक मंगळवारी (६ ऑक्टोबर) दिल्लीत होणार असून, त्यामध्ये मंत्रालयाच्या सचिव उपस्थित राहणार आहेत. 'एफटीआयआय'च्या विद्यार्थ्यांनी सुरू केलेल्या संपावर तोडगा काढण्यासाठी माहिती आणि प्रसारण मंत्रालय प्रयत्नशील आहे. त्या दृष्टीने २९ सप्टेंबर रोजी मुंबईत फिल्म्स डिव्हिजन येथे चर्चेची एक फेरी झाली. त्यात काही निष्पन्न न झाल्याने पुन्हा गुरुवारी (१ ऑक्टोबर) चर्चा करण्यात आली. मात्र, त्यातही निश्चित निर्णय होऊ शकला नाही. त्यामुळे अजून एक बैठक घेण्याचे ठरवण्यात आले. आता दिल्लीत होणाऱ्या बैठकीत थेट सचिवच सहभागी होणार असल्याने त्यात तरी काही ठोस निर्णय होणे अपेक्षित आहे.
विद्यार्थी शिष्टमंडळात हरिशंकर नचिमुथू, विकास अर्स, रणजित नायर, रिमा कौर, मलयज अवस्थी, अजयन अडाट, शिनी जे. के. या विद्यार्थ्यांचा समावेश आहे.
मंत्रालय करणार खर्च
संप सुरू झाल्यावर काही दिवसांनी सरकारशी चर्चा करण्यासाठी विद्यार्थी दिल्लीत गेले होते. त्याचा खर्च 'एफटीआयआय'ने केला होता. त्यावर बरीच उलटसुलट चर्चा झाली होती. त्या पार्श्वभूमीवर, मंगळवारी पुन्हा दिल्लीतच होणाऱ्या चर्चेसाठीचा विद्यार्थ्यांचा खर्च मंत्रालयाकडून केला जाणार असल्याचे विद्यार्थ्यांकडून स्पष्ट करण्यात आले.
मोबाइल अॅप डाउनलोड करा आणि राहा अपडेट
