शस्त्रांची दिलेली ऑर्डर घेण्यासाठी आलेले दोघे व विक्री करण्यासाठी आलेला एकजण अशा तिघांना गुन्हे शाखेच्या युनिट तीनने मंगळवारी दुपारी अटक केली आहे. त्यांच्याकडून आठ पिस्तूल, वीस जिवंत काडतुसे आणि मोटार असा एकूण आठ लाख ७२ हजार रुपयांचा ऐवज जप्त करण्यात आला आहे.
सनी मुरलीधर सदाफुले (वय २४, रा. मयुर निवास, जामखेड, अहमदनगर), नितीन सुधाकर अवचिते (वय २९, रा. तळेगाव स्टेशन, हरणेवाडी, ता. मावळ) आणि जगदीश पोपट दराडे (वय १९, रा. अकोले, ता. इंदापूर) अशी अटक केलेल्यांची नावे आहेत. गणेशोत्सवात अनुचित प्रकार घडू नये म्हणून सराईत गुन्हेगारांवर नजर ठेवण्याच्या सूचना पोलिस आयुक्त के. के. पाठक, सहआयुक्त सुनील रामानंद यांनी दिल्या होत्या. त्यानुसार गुन्हे शाखा युनिट दोनचे पोलिस निरीक्षक सतीश निकम व त्यांच्या पथकातील कर्मचारी सराईत गुन्हेगारांवर पाळत ठेऊन होते. त्यावेळी त्यांना वडगाव मावळ येथील सराईत गुन्हेगार अवचिते हा पिस्तूल खरेदी करण्यासाठी सिंहगड रस्त्यावरील गणपती मंदिराजवळ येणार आहे, अशी माहिती खबऱ्याकडून मिळाली. त्यानुसार अतिरिक्त पोलिस आयुक्त सी. एच. वाकडे, पोलिस उपायुक्त बी. आर. पाटील यांच्या मार्गदर्शनाखाली या ठिकाणी सापळा लावण्यात आला.
सिंहगड रस्त्यावरील गणपती मंदिराजवळ मंगळवारी दुपारी एक मोटार व एक दुचाकी आली. पोलिसांनी या मोटारीतील तिघांना ताब्यात घेतले. त्यांची झडती घेतली असता तिघांकडे प्रत्येकी दोन पिस्तूल आणि चार काडतुसे, तर अवचिते याच्याकडे आणखी रिव्हॉल्वर असा एकूण आठ पिस्तूल व वीस काडतुसे, मोटार असा ऐवज जप्त करण्यात आला. सदाफुले हा पिस्तुल विक्रीसाठी घेऊन आला होता. तर, अवचिते व दराडे हे खरेदीसाठी आले होते. अवचिते याच्यावर वडगाव मावळ पोलिस ठाण्यात खुनाचे दोन गुन्हे दाखल आहेत. तर, निगडी पोलिस ठाण्यात वाहन चोरीचा एक गुन्हा दाखल आहे. तसेच, दराडेवर सातारा शहरमध्ये एक खुनाच्या प्रयत्नाचा आणि चार घरफोडीचे गुन्हे दाखल आहेत. सदाफुलेवर जामखेड पोलिस ठाण्यात एक गुन्हा दाखल आहे. एवढ्या मोठ्या प्रमाणात शस्त्रास्त्र कशासाठी मागविली होती, याचा आरोपींकडे तपास सुरू आहे, अशी माहिती पोलिस निरीक्षक सतीश निकम यांनी दिली.
नऊ महिन्यांत दीडशे पिस्तुले जप्त
गेल्या नऊ महिन्यांत शहर पोलिसांनी १५० पिस्तुले, ३७५ जिवंत काडतुसे जप्त केली असून बेकायदा शस्त्रास्त्र बाळगल्याप्रकरणी १७७ जणांना अटक केली आहे. मध्य प्रदेश आणि उत्तर प्रदेशातून कवडीमोल भावाने पिस्तुलांची खरेदी करून त्याची विक्री पुण्यात करण्यात येते. पोलिस अग्नीशस्त्रांची तस्करी करणाऱ्यांवर नजर ठेवून असल्याची माहिती पोलिस उपायुक्त पी. आर. पाटील यांनी दिली.
मोबाइल अॅप डाउनलोड करा आणि राहा अपडेट
