मावळ तालुक्यात शुक्रवारी झालेल्या मुसळधार पावसामुळे जुन्या पुणे-मुंबई हाय-वेवर मोठ्या प्रमाणावर पाणी आल्याने वाहतूक विस्कळित झाली. कामशेत येथे रेल्वेच्या ट्रॅक खालील वाळू वाहून गेल्याने पुणे-मुंबई रेल्वे सेवाही बाधित झाली होती. पुण्याहून सुटणाऱ्या लोकल तळेगावपर्यंत सोडण्यात येत होत्या. त्यामुळे अनेक नागरिकांचे हाल झाले.
लोणावळा, कामशेत, वडगाव, तळेगाव, कार्ला या भागात ढगफुटी सदृश्य पाऊस पडला. त्यामुळे ओढ्यांना-नाल्यांना पूर आला होता. कामशेत ते वडगाव दरम्यानचा आठ किलोमीटरचा मार्ग पाण्याखाली गेला होता. यामुळे यामार्गावरील दोन्ही ठिकाणची वाहतूक काही काळ ठप्प झाली होती. कामशेत येथील रेल्वे ट्रॅक शेजारील नदीचे पाणी ट्रॅकवर घुसल्याने अनेक ठिकाणची वाळू वाहून गेली. त्यामुळे जुन्या हायवेवर वाहतूक संथ गतीने होती, तर रेल्वेची पुणे-लोणावळा लोकल सेवा तळेगावपर्यंतच सुरू ठेवण्यात आली. पुण्याहून मुंबईला जाणाऱ्या सर्व गाड्या अर्धा ते पाऊण तास उशिराने धावत होत्या.
रेल्वेच्या इंजिनीअर्सनी घटनास्थळी धाव घेऊन सहाच्या सुमारास रेल्वेचा मार्ग पूर्ववत केला. त्यामुळे पुणे-लोणावळा मार्गावरील अप आणि डाउन मार्गावरील वाहतूक तळेगावपर्यंतच सुरू होती. मुंबईहून सुटलेली व पुण्यात सव्वाचार वाजता पोहोचणारी हैदराबाद एक्स्प्रेस कामशेतला रात्री साडेआठ वाजेपर्यंत थांबून होती. पुणे-इंदूर एक्स्प्रेस तळेगाव स्टेशनजवळ तर लोणावळ्याच्या दिशेने जाणारी लोकल कामशेत स्टेशनजवळ थांबविण्यात आली होती.
अतिक्रमणांवर कारवाई गरजेची
जुन्या पुणे- मुंबई हायवेलगत देहूरोड ते खंडाळ्यापर्यंत मोठ्या प्रमाणात बेकायदा बांधकामे आणि अतिक्रमण झाले आहे. त्यामुळे या परिसरातील पाण्याचे मूळ नैसर्गिक प्रवाह बदलले आहेत. अनेक ठिकाणी ओढे-नाले बुजविल्याने पाणी रस्त्यावर आले. मार्गालगतच्या वाढत्या अतिक्रमणांची वेळीच दखल न घेतल्यास भविष्यात वडगाव, कान्हे, कामशेत, मळवली, कार्ला आणि लोणावळा परिसरात अशा प्रकारचे मोठे संकट ओढावण्याची शक्यता नाकारता येत नाही.
एक्स्प्रेस वेवर एक फूट पाणी
पुणे-मुंबई एक्स्प्रेस वेवर कामशेत बोगदा ते उर्से दरम्यान एक फुटाइतके पाणी वाहत होते. यामुळे एक्स्प्रेस वेवरील वाहतूक अर्धा तास धिम्या गतीने सुरू होती. पाणी ओसरल्यानंतर पुन्हा वाहतूक सुरळीत सुरू झाल्याने प्रवाशांनी सुटकेचा निश्वास टाकला.
मोबाइल अॅप डाउनलोड करा आणि राहा अपडेट
