ज्येष्ठ समालोचक बाळ ज. पंडित (वय ८६) यांचे गुरुवारी दुपारी साडेचारच्या सुमारास पूना हॉस्पिटलमध्ये निधन झाले. त्यांच्यामागे पत्नी, दोन मुलगे आणि दोन मुली असा परिवार आहे. रात्री ११ च्या सुमारास त्यांच्यावर वैकुंठ स्मशानभूमीत अंत्यसंस्कार झाले.
क्रीडा समीक्षक बाळ पंडित यांनी महाराष्ट्र क्रिकेट संघटनेचे अध्यक्षपद भूषविले होते. पंडित यांनी चाळीसहून अधिक वर्षे विविध भूमिकेतून क्रीडा सेवा केली. ज्या काळात दूरदर्शन नव्हते आणि आकाशवाणी हे एकमेव माध्यम होते, त्या काळात पंडित यांनी क्रिकेटच्या सामन्यांचे मराठीतून धावते समालोचन करण्याचा प्रघात सुरू केला. 'प्रत्यक्षाहून प्रतिमा उत्कट' याचीच अनुभूती जणू त्यांच्या समालोचनातून मिळत असे. चाळीसहून अधिक वर्षे त्यांनी क्रिकेटचे धावते समालोचन केले. 'लिम्का बुक ऑफ रेकार्ड'नेही याची दखल घेतली. क्रीडा समीक्षक म्हणून जवळजवळ ५० वर्षे त्यांनी वृत्तपत्रांतून लिखाण केले. त्यांची क्रिकेटवर ३५हून अधिक पुस्तके प्रकाशित झाली. त्यांच्या 'पराक्रमी दौरा' आणि 'दी लिटल मास्टर' या पुस्तकांना राष्ट्रीय स्तरावरचे पुरस्कार मिळाले.
बाळ पंडित एमए, एलएलबी होते. एलएलबीच्या परीक्षेत ते पुणे विद्यापीठात तिसरे आले होते. केवळ क्रीडा क्षेत्रच नव्हे, तर इतर क्षेत्रांतही पंडित यांनी मोलाचे योगदान दिले. त्यांनी आळंदीच्या श्री ज्ञानेश्वर महाराज देवस्थानचे विश्वस्त म्हणून अनेक वर्षे सेवा केली. याशिवाय शिक्षण प्रसारक मंडळींसारख्या नामवंत शिक्षण संस्थांचे पदाधिकारी म्हणूनही त्यांनी काम पाहिले.
बाळासाहेबांबद्दल मला फार आदर आहे. त्यांच्या निधनाने आपण क्रिकेटचा मराठी शब्दकोशच गमावला. क्रिकेटमध्ये मराठीमध्ये समालोचन त्यांच्यापासून झाले. त्यांनी मराठीत क्रिकेटमधील वेगवेगळे शब्द शोधून काढले आणि क्रिकेटप्रेमींपर्यंत पोहचविले. त्यामुळे चाहत्यांना क्रिकेट समजण्यास सोपे गेले. क्रिकेटमध्ये आणि महाराष्ट्र क्रिकेट असोसिएशनमध्येही त्यांचे योगदान राहिले आहे.
- चंदू बोर्डे, माजी कसोटीपटू
मोबाइल अॅप डाउनलोड करा आणि राहा अपडेट
