लघुशंकेसाठी थांबलेल्या व्यक्तीला मारहाण करून लुटल्याची घटना डहाणूकर कॉलनी बस स्टॉपवर शनिवारी पहाटे घडली. रात्रीच्या गस्तीवर असलेल्या पोलिसांनी या प्रकरणी एका आरोपीला पाठलाग करून पकडले. त्याच्या दोन साथीदारांचा शोध सुरू आहे. या प्रकरणी अलंकार पोलिस ठाण्यात गुन्हा दाखल करण्यात आला आहे.
अक्षय लालासाहेब गोगावले (१९, रा. उत्तमनगर, वारजे) असे अटक केलेल्याचे नाव आहे. त्याचे साथीदार संदीप सावंत, अमन खान (रा. वारजे) आणि आणखी एकाचा शोध सुरू आहे. उमाकांत राठोड (३३, रा. रांजणगाव, शिरूर) यांनी या प्रकरणी तक्रार दिली आहे. पोलिसांनी दिलेल्या माहितीनुसार, राठोड शनिवारी पहाटे डहाणूकर कॉलनीतून टेम्पो-ट्रॅव्हल्समधून जात होते. पहाटे चारच्या सुमारास डहाणूकर कॉलनी बस स्टॉपजवळ ते लघुशंकेसाठी थांबले होते. त्या वेळी दोन मोटारसायकलवरून आलेल्या चौघांनी त्यांना मारहाण केली. त्यांच्या जवळील रोख दोन हजार आणि एक मोबाइल असा माल चोरून नेला. आरोपी पळून गेल्यानंतर राठोड यांनी आरडाओरडा केला. त्यामुळे रात्रीच्या गस्तीवर असलेले डेक्कन पोलिस ठाण्याचे कर्माचारी घटनास्थळी पोहचले. त्यांनी राठोड यांच्याकडे चौकशी केल्यानंतर आरोपींचा पाठलाग केला. त्या वेळी त्यांना गोगावले सापडला. त्याचे इतर साथीदार फरारी आहेत. या प्रकरणी अलंकार पोलिस ठाण्याचे फौजदार धनवे अधिक तपास करत आहेत.
चोरट्यांना प्रतिकार; डॉक्टरवर हल्ला
कारमध्ये बसलेल्या डॉक्टरच्या हातातील मोबाइल हिसकवण्याचा प्रयत्न करणाऱ्या चोरट्यांनी त्याच्यावरच जीवघेणा हल्ला केल्याची घटना संगमवाडी येथे नुकतीच घडली. या प्रकरणी येरवडा पोलिस ठाण्यात जबरी चोरीचा गुन्हा दाखल करण्यात आला आहे.
याबाबत प्रतीक सोपकर (२६, रा. शिवाजीनगर) यांनी तक्रार दाखल केली आहे. प्रतीक संगमवाडी येथील लक्झरी ट्रॅव्हल्सच्या स्टॉपजवळ कार थांबवून मोबाइलमध्ये आलेले मेसेज पाहत होते. त्या वेळी दुचाकीवरून आलेल्या दोघांनी त्यांच्या हातातील मोबाइल हिसकवण्याचा प्रयत्न केला. प्रतीक यांनी त्यांना प्रतिकार केला. त्यानंतर आरोपींनी प्रतीक यांच्या गळ्यावर धारदार शस्त्राने वार केले.
मोबाइल अॅप डाउनलोड करा आणि राहा अपडेट
