पुणे- सातारा रोडवरील श्री शंकर महाराज उड्डाणपुलावर दुचाकी, जीप आणि टेम्पोमध्ये झालेल्या विचित्र अपघातात एक दुचाकीस्वार जखमी झाला. स्वारगेटच्या दिशेने जाणाऱ्या लेनवर मंगळवारी दुपारी हा अपघात झाला. दुचाकी घसरल्याने दुचाकीस्वार रस्त्याच्याकडेला पडला. त्याचवेळी पाठीमागून आलेल्या जीपने दुचाकीला चिरडले; तर जीपच्या पाठीमागून आलेल्या टेम्पोने जीपला जोराची धडक दिली.
सातारा रोडवरील बालाजीनगर आणि परिसरातील वाहतूक कोंडी कमी करण्यासाठी श्री शंकर महाराज उड्डाणपूल बांधण्यात आला आहे. या पुलावर स्वारगेटच्या दिशेने जाताना उतारावर हा अपघात झाला. पाऊस असल्याने दुचाकीस्वार घसरून रस्ताच्याकडेला पडला होता. त्याचवेळी त्याच्या पाठीमागून एक जीप येत होती. जीपचालकाने अपघात वेग नियंत्रित करण्याचा प्रयत्न केला. मात्र, जीपखाली दुचाकी सापडली.
हा अपघात उड्डाणपुलाच्या उतारावर झाला असल्याने वाहनांना वेग होता. जीप पाठीमागून आलेल्या आयशर टेम्पोने जीपला पाठीमागून जोराची धडक दिली. कॅश घेऊन जाणाऱ्या या जीपच्या पाठीमागील दरवाज्याचे मोठ्या प्रमाणात नुकसान झाले. उड्डाणपुलावरील एक लेन बंद पडल्याने काही वेळ वाहतुकीची कोंडी झाली होती. मात्र, सहकारनगर पोलिसांनी लगेचच वाहने बाजूला करत वाहतूक पूर्ववत केली. या उड्डाणपुलाचा उतार हा यशवंतराव चव्हाण कमानीसमोरील चौकापर्यंत आलेला आहे. त्यामुळे पुलावरून येणारी वाहने या चौकात वेगात येतात. या उड्डाण पुलावरील वाहतूक सुरू केल्यानंतर या चौकातील किरकोळ अपघातांमध्ये वाढ झाली आहे.
उड्डाणपुलामुळे सातारारोडवरील वाहतूक कोंडी कमी होण्यास मोठ्या प्रमाणात झाली आहे. मात्र, स्वारगेटच्या दिशेने पुलाचा उतार हा चौकात येत असल्याने त्या ठिकाणी किरकोळ अपघात झाले आहेत. महापालिकेने आता स्पीडब्रेकर टाकत पुलावरून येणाऱ्या वाहनांचा वेग नियंत्रित केला आहे. मात्र, भविष्यात या ठिकाणी खबरदारी घ्यावी लागेल. उड्डाणपुलावर झालेला हा अपघात उतारावर झाला आहे.
- नंदकिशोर कव्हेळे, पोलिस कर्मचारी, सहकारनगर पोलिस ठाणे
या उड्डाणपुलाचा फायदा हा भारती विद्यापीठ, कात्रजकडे जाणाऱ्या तसेच विरुद्ध दिशेने येणाऱ्या वाहनांना झाला आहे. स्वारगेटच्या दिशेने जाणारी वाहने उड्डाणपुलावरून वेगात येत असल्याने अपघात घडण्याची शक्यता आहे. यशवंतराव चव्हाण कमानीसमोर हा पूल संपवण्यात आला आहे. या पुलाचा शेवट आणखी पुढे करण्यात आला असता तर त्याचा अधिक फायदा झाला असता.
- गौरव घोरपडे, नागरिक, बालाजीनगर
मोबाइल अॅप डाउनलोड करा आणि राहा अपडेट