म. टा. प्रतिनिधी, पुणे
तब्बल सव्वाशे वर्षे जुन्या महात्मा फुले मंडईचा प्रथमच संपूर्ण कायापालट करण्यात आला असून, रंगीबेरंगी दिव्यांच्या झगमगाटाने मंडईची वास्तू उजळून निघणार आहे. सायंकाळच्या वेळेत एखाद्या वास्तूचे सौंदर्य खुलविण्यासाठी बहुरंगी विद्युतदिव्यांचा प्रयोग मंडईच्या वैशिष्ट्यपूर्ण इमारतीवर महापालिकेतर्फे करण्यात आला आहे. येत्या रविवारपासून पुणेकरांना मंडईची झळाळी नव्याने अनुभवता येणार आहे.
पालिकेच्या हेरिटेज सेल विभागातर्फे मंडईच्या नूतनीकरणाचे काम गेल्या दीड वर्षांपासून सुरू होते. नुकतेच हे काम पूर्ण झाले असून, मंडईच्या इमारतीत नव्याने बसविण्यात आलेल्या प्रकाशयोजनेचे उद्घाटन येत्या रविवारी (२३ ऑगस्ट) सायंकाळी सात वाजता होणार आहे, अशी माहिती महापौर दत्तात्रय धनकवडे यांनी दिली.
मंडईच्या इमारतीची किरकोळ डागडुजी आणि दुरुस्ती आत्तापर्यंत केली गेली होती; पण सव्वाशे वर्ष जुन्या इमारतीतील सर्व व्यवस्थेची तपासणी आणि त्याचे नूतनीकरण पहिल्यांदाच करण्यात आले आहे. या सर्व प्रक्रियेत सर्वप्रथम इमारतीचे स्ट्रक्चरल ऑडिट करण्यात आले. कालानुरूप इमारतीचे बांधकाम, लाकडी काम यांची झिज भरून काढणे आवश्यक होते. काही ठिकाणी गळतीमुळे खराब झालेल्या भागाची दुरुस्ती करावी लागणार होती. तसेच, सव्वाशे वर्षांत एकदाही अष्टकोनाकृती इमारतीवरील कौले बदलण्यात आली नसल्याने हे कामही केले गेले.
इमारतीची दुरुस्ती करताना पुन्हा पावसा-पाण्यामुळे आतमधील बांधकामाला इजा होऊ नये, यासाठी जीआयएस शीटचा वापर करण्यात आला आहे. तसेच, इमारतीसाठी वापरण्यात आलेला दगड कालौघात काळा पडला होता. त्यालाही यानिमित्त ऊर्जितावस्था देण्यात आली, अशी माहिती हेरिटेज सेलचे प्रमुख शाम ढवळे यांनी दिली.
मंडईच्या इमारतीचे जतन, संवर्धनाचे सर्व काम पूर्ण झाल्यानंतर संपूर्ण इमारतीवर मल्टिकलर लायटिंग करण्यात आले आहे. त्याला विविध इफेक्ट देण्यात आले असून, सायंकाळच्या वेळी मंडईची इमारत आणखी उठावदार दिसणार आहे.
मंडईची कौले स्पेनधून
मंडईच्या १२० फूट उंच अष्टकोनाकृती शिखरावर आणि त्याला जोडून असलेल्या इमारतींवरील कौले फ्रान्समधील मार्सिली शहरातील एका कंपनीची असल्याचा शिक्का त्यावर होता. इमारतीवरील सुमारे २० टक्के म्हणजेच साडेचार हजार कौले बदलणे गरजेचे होते. त्याच जाडीची कौले भारतात मिळत नसल्याने महापालिकेने तशाच स्वरूपाची कौले मागविण्याचा निर्णय घेतला. फ्रान्सचे शेजारी राष्ट्र असलेल्या स्पेनमधील हर्मनोस डियाज रेडोन्डो ग्रुप या कंपनीतून मूळ दर्जाशी साधर्म्य साधणारी कौले मिळाल्याने मंडईच्या इमारतीची शोभा आणखी वाढली.
मोबाइल अॅप डाउनलोड करा आणि राहा अपडेट