बनावट कागदपत्रे सादर करून बँक ऑफ महाराष्ट्रच्या वाकड शाखेची फसवणूक केलेल्या टोळीतील दोघांनी यापूर्वी अशाच प्रकारे अनेकांची फसवणूक केल्याचे उघडकीस आले आहे. या दोघांवर २०११ मध्ये पुणे शहरातील वेगवेगळ्या पोलिस ठाण्यात फसवणुकीचे आठ गुन्हे दाखल आहेत.
संदीप विश्वास साबळे (३१, रा. कल्याणीनगर), संतोष विष्णू तिंबोळे (३२, रा. सांगवी), विठ्ठल गोविंद आईर ऊर्फ शिंदे (४९, रा. भोसरी) आणि पुरुषोत्तम शंकर कुलकर्णी (४१, रा. औंध गाव) अशी अटक करण्यात आलेल्यांची नावे आहे. त्यांचे साथीदार रमेश लखम कुशवाह, श्वेता रमेश कुशवाह व अन्य दोघे फरारी आहेत. या प्रकरणी वाकड पोलिस ठाण्यात बँक ऑफ महाराष्ट्रच्या शाखा व्यवस्थापक छाया गिरीश भगूरकर (५०, रा. वारजे) यांनी फिर्याद दिली आहे. पोलिसांनी दिलेल्या माहितीनुसार, या टोळीने एकाच 'रो हाउस'वर चार वेगवेगळ्या बँका व फायनान्स कंपनीकडून साडेचार कोटी रुपयांचे कर्ज घेतल्याचीही माहिती समोर आली आहे.
चोरटे या पैशांपैकी एक कोटी रुपये एका जुगार अड्यावर हरले असून, एक आरोपी सांगवी भागात बांधकाम व्यावसायिक म्हणून उदयास येत आहे. बाणेर येथे राजीव रोशा यांचे एक अलिशान 'रो हाउस' आहे. रोशा यांना हे 'रो हाउस' विकायचे असल्याने संदीप साबळे, संतोष व त्यांच्या साथीदारांनी त्यांच्याशी संपर्क साधला. त्यानंतर दीड कोटी रुपयांना व्यवहार ठरला. त्यानुसार अनामत रक्कम म्हणून एक लाख रुपयांचा धनादेश देण्यात आला. कागदपत्राची कायदेशीर तपासणी, चौकशी करण्यासाठी रो हाउसच्या कागदपत्रांचा एक सेट घेण्यात आला. झेरॉक्सच्या आधारे या टोळीने रोशा यांचा फोटो वापरून बनावट खरेदीखत तयार केले. त्याआधारे बँक ऑफ महाराष्ट्र बँकेकडून एक कोटी आठ लाख रुपयांचे कर्ज घेतले. त्यासाठी बनावट कागदपत्र सादर केली. त्यानंतर एनकेसीएसबी बँकेकडून ६० लाखांचे, श्रीराम सिटी युनियन फायनान्सकडून ५० लाख, तर स्टेट बँक हैदराबाद यांच्याकडून ८० लाखांचे कर्ज घेतल्याचे तपासात निष्पन्न झाले आहे.
आरोपी पूर्वी वेगवेगळ्या बँकांसाठी कर्ज मंजूर करून देण्याचे काम करत होते. त्यातून सर्व माहिती मिळवून त्यांनी हा घोटाळा केल्याचे पोलिसांचे म्हणणे आहे. संतोष तिंबोळे याने बँक ऑफ महाराष्ट्र आणि इतर बँकाची ज्याप्रकारे फसवणूक केली आहे, त्याच प्रकारे या दोघांनी यापूर्वीही अनेकांची फसवणूक केली आहे. संदीप आणि संतोष यांच्या विरोधात २०११मध्ये पुणे शहरातील कोथरूड, विश्रामबाग, लष्कर, स्वारगेट, येरवडा या पोलिस ठाण्यात तब्बल आठ गुन्हे दाखल आहेत. सहायक निरीक्षक प्रमोद क्षीरसागर तपास करीत आहेत.
पिंपरीत घरफोडी
पिंपरीतील खराळवाडी परिसरातील दोन इमारतींमधील चार सदनिकांची कुलुपे तोडून चोरट्यांनी मौल्यवान ऐवज लंपास केला. रविवारी (९ ऑगस्ट) पहाटेच्या सुमारास ही घटना घडली. आझर महंमद इसाक दिंडोरे (वय ३१, रा. इंद्रायणीनगर, भोसरी) यांनी फिर्याद दिली आहे. पोलिसांनी दिलेल्या माहितीनुसार, रविवारी पहाटेच्या सुमारास पिंपरीतील कामगारभवन समोरील असलेल्या जय गणेश वरदहस्त, तसेच एजी चेंबर्समध्ये चोरी केली. या वेळी येथील एका दैनिकाच्या कार्यालयातील मोबाइल टॅब चोरून नेला आहे. रशिद फरीद शेख याच्या घरातील १५ ग्रॅम वजनाच्या सोन्याच्या लहान लहान अंगठ्या, रिंगा व गळ्यातील लहान सोन्याचे पान असा आदी दागिने लंपास केल आहेत. सहायक निरीक्षक सुरेश मट्टामी अधिक तपास करीत आहेत.
मोबाइल अॅप डाउनलोड करा आणि राहा अपडेट
