राष्ट्रवादी काँग्रेसचे नेते अजित पवार पिंपरी-चिंचवड महापालिकेतील भ्रष्टाचाराची पाठराखण करीत असल्याचा आरोप करीत त्यांच्याविरोधात भारतीय जनता पक्ष आणि शिवसेनेने टिकेचे अस्त्र उपसले आहे. ७० हजार कोटी रुपयांच्या घोटाळ्याचा आरोप असणाऱ्या अजितदादांना पालिकेतील भ्रष्टाचार किरकोळ वाटत आहे, असे शिवसेनेने म्हटले आहे. तर, पालिकेतील भ्रष्टाचाराला अजितदादांची संमती असल्याचा आरोप भारतीय जनता पक्षाने केला आहे.
राष्ट्रवादी काँग्रेसच्या नगरसेवकांच्या बैठकीनंतर पवार यांनी पत्रकारांशी संवाद साधताना डॉ. आनंद जगदाळे यांच्यावरील कारवाई सौम्य करण्याच्या निर्णयाचे समर्थन केले. तसेच याबाबतचा अधिकार महापालिका सर्वसाधारण सभेचा असल्याचेही स्पष्ट केले. त्यासंदर्भात शिवसेनेच्या गटनेत्या सुलभा उबाळे यांनी दिलेल्या निवेदनात म्हटले आहे, पवार यांच्या भूमिकेचा शहर शिवसेना निषेध करीत आहे. वास्तविक, 'एचबीओटी'चे ७० लाख रुपयांचे मशीन दोन कोटी ७८ लाख रुपयांना खरेदी केल्याप्रकरणी राज्य सरकार आणि महापालिकेने डॉ. जगदाळे यांच्यावर दोषारोप पत्र दाखल केले. त्यामुळे डॉ. जगदाळे यांची सेवानिवृत्तीचे शंभर टक्के रक्कम राखून ठेवली आहे. तरीही नुकत्याच झालेल्या सर्वसाधारण सभेत डॉ. जगदाळे यांच्या सेवानिवृत्ती वेतनातून पाच वर्षांसाठी २० ऐवजी दहा टक्केच रक्कम राखून ठेवावी, अशी उपसूचना राष्ट्रवादी काँग्रेसने मंजूर केली. त्याला विरोध असताना आणि मतदानाची मागणी केली असता ती धुडकावून लावली. तसेच तीन नगरसेविकांना निलंबित केले. त्याचे समर्थन पवार करीत असल्याचा धक्का बसला. त्यांना हा भ्रष्टाचार किरकोळ वाटत असावा.'
अजित पवार यांच्या भूमिकेविषयी तीव्र नाराजी व्यक्त करीत भाजपचे सारंग कामतेकर म्हणाले, 'गेल्या दहा वर्षांत झालेल्या भ्रष्टाचाराला पवार यांची संमती असावी. राष्ट्रवादी काँग्रेसचे वरिष्ठ नेतेच भ्रष्टाचाराचे उघडपणे समर्थन करू लागल्याने जनतेने काय बोध घ्यायचा? असा प्रश्न निर्माण होतो. त्यामुळे पवारच भ्रष्टाचाराला खतपाणी घालत असल्याचे दिसून येते. त्यासाठी झोपडपट्टी पुनर्वसन, बीआरटीएस, पूररेषेचे नकाशे, ताथवडे विकास आराखडा, वायसीएम रुग्णालयासाठी खरेदी ही उदाहरणे देता येतील.'
मोबाइल अॅप डाउनलोड करा आणि राहा अपडेट