मुंबई-पुणे एक्स्प्रेस-वेवर दोन नंबरच्या कामशेत बोगद्याजवळ कारच्या अपघातात वरळीच्या पोलिस निरिक्षकासह पोलिस हवालदाराचा मृत्यू झाला, तर दोघे गंभीर जखमी झाले आहेत. जखमी झालेल्यामध्ये एका वकिलाचा समावेश आहे. हा अपघात शुक्रवारी दुपारी दोनच्या सुमारास झाला.
वरळी पोलिस स्टेशनचे पोलिस निरीक्षक अर्जुन शंकर केंगार (वय ४७) आणि मुंबई पोलिस मुख्यालयातील हवालदार सतीश किसन शिंदे (वय ५१) अशी मृत्युमखी पडलेल्या पोलिसांची नावे आहेत. जखमींमध्ये अॅड. शिवाजी हराळ (वय ३१, रा. ताडदेव, मुंबई) आणि कार चालक जेरल्ड रिचर्ड रोझ (वय ४९, रा. वरळी) यांचा समावेश आहे.
वडगाव पोलिसांनी दिलेल्या माहितीनुसार केंगार आणि त्यांचे वकील सहकारी कामानिमित्त वाई येथे त्यांच्या रेनॉल्ट डस्टर कारने (एमएच ४६ टी ७२२७) निघाले होते. शुक्रवारी दिवसभर मावळमध्ये मुसळधार पाऊस कोसळत होता. दरम्यान मुंबई-पुणे एक्स्प्रेस-वेवरील कामशेत येथील दोन नंबरचा बोगदा सोडल्यानंतर बाजूने जाणाऱ्या वाहनामुळे रस्त्यावर साचलेले पाणी त्यांच्या कारच्या काचेवर उडाले. त्यामुळे चालकाचा कारवरील ताबा सुटला आणि ती मार्गालगत डाव्या बाजूला असलेल्या खड्ड्यात कोसळली. त्यात केंगार आणि शिंदे यांचा जागीच मृत्यू झाला, तर वकील आणि कारचालक गंभीर जखमी झाले. त्यांच्यावर निगडीच्या लोकमान्य हॉस्पिटलात उपचार सुरू आहेत.
मोबाइल अॅप डाउनलोड करा आणि राहा अपडेट
