महाराष्ट्र आणि कर्नाटक पोलिस दलांतील अधिकाऱ्यांनी एकत्र येऊन सोनसाखळी चोरांविरुद्ध मोहीम उघडली आहे. या अधिकाऱ्यांनी 'व्हॉट्सअॅप' ग्रुप तयार करून सोनसाखळी संदर्भातील माहिती गोळा करण्यास सुरुवात केली आहे. यातून मिळालेली सोनसाखळी चोरीची घटना, आरोपी, 'सीसीटीव्ही' फुटेज आदी प्राथमिक माहिती तत्काळ शेअर करण्यात येत आहे.
सोनसाखळीचोरांना रोखण्यासाठी पुणे पोलिसांनी पुढाकार घेऊन बुधवारी विविध पोलिस दलांची आंतरराज्य बैठक आयोजित केली होती. कर्नाटक, पुणे शहर, पुणे ग्रामीण, नगर, रायगड, बीड, नागपूर ग्रामीण, कोल्हापूर, जळगाव आदी ठिकाणचे पोलिस अधिकारी या बैठकीसाठी उपस्थित होते. या पोलिस दलांच्या हद्दीत इराणी वस्ती मोठ्या प्रमाणात आहे. या वस्त्यांमधील संशयितांकडून देशभरातील विविध शहरांत सोनसाखळी चोरीचे गुन्हे करण्यात आले आहेत. या पार्श्वभूमीवर गुन्हेगारांना रोखण्यासाठी पोलिस दलांमध्ये समन्वय असावा, या साठी बैठकीचे आयोजन करण्यात आले होते, अशी माहिती सहायक आयुक्त राजेंद्र जोशी यांनी सांगितले.
बैठकीसाठी आलेले बहुतांश अधिकारी गुन्हे शाखेतील होते. सोनसाखळी चोरीचे गुन्हे रोखण्यासाठी ते आपापल्या भागात प्रयत्न करत आहेत. त्यांना त्यांच्याकडील रेकॉर्डवरील गुन्हेगारांची माहिती घेऊन बैठकीसाठी बोलवण्यात आले होते. सर्वांनी आपापल्या हद्दीतील गुन्हेगारांची माहिती आणल्याने सोनसाखळी चोरट्यांचा मोठ्या प्रमाणात डाटा तयार झाला आहे. फरार आरोपींचे नाव, पत्ते तसेच फोटोही शेअर करण्यात आले आहेत.
मोबाइल अॅप डाउनलोड करा आणि राहा अपडेट