पुणे टाइम्स टीम
ट्रेकिंगच्या स्पर्धेत मुलींचाही दमदार प्रतिसाद असतो आणि त्याही उत्तम स्पर्धा करू शकतात, हे पाहायचं असेल तर कात्रज ते सिंहगड (केटूएस) या इंटरकॉलेजिएट नाइट रेसला पर्याय नाही. यंदाही कॉलेज आणि ओपन या दोन्ही विभागात मुलींनी दमदार प्रतिसाद नोंदवत आपण लढतीसाठी सज्ज असल्याचं दाखवून दिलं आहे.
नॅशनल एज्युकेशन फाउंडेशनतर्फे (एनईएफ) केटूएस स्पर्धेचं आयोजन करण्यात आलं आहे. येत्या ३१ जुलैला ही स्पर्धा होणार आहे. 'महाराष्ट्र टाइम्स' स्पर्धेचा मीडिया पार्टनर आहे, 'व्होडाफोन', 'एसएलके ग्लोबल', 'डीएसके बेनेली' आणि 'रेडबुल' हे या स्पर्धेचे प्रायोजक आहेत.
कॉलेजियन्ससाठी स्पर्धेत 'इंटरकॉलेजियन्स मिक्स', 'कॉलेजियन मिक्स', 'इंटरकॉलेजियन ऑल गर्ल्स', 'कॉलेजियन ऑल गर्ल्स', तर ओपनमध्ये 'अमॅच्युअर मिक्स', 'कॉर्पोरेट मिक्स', 'ओपन ऑल वुमेन' आणि मीडिया अशा टीम करता येणार आहेत. प्रत्येक विभागातल्या टीममध्ये तीन स्पर्धक आणि त्यामध्ये एका महिला स्पर्धकाचा सहभाग अनिवार्य असणार आहे. स्पर्धेतल्या ओपन कॅटेगरीचा फ्लॅगऑफ कात्रज घाटातल्या जुन्या बोगद्याच्या माथ्यावरून दुपारी ४ वाजता, तर 'इंटरकॉलेजिएट नाइट अॅडव्हेंचर रेस'चा फ्लॅगऑफ संध्याकाळी ६.३० वाजता होणार आहे.
स्पर्धेत ऑल गर्ल्स टीमशिवाय प्रत्येक कॅटेगरीतल्या टीममध्ये तीन जण आणि त्यात एका मुलीचा सहभाग अनिवार्य असतो. असं असलं तरी 'ऑल गर्ल्स'टीमही मोठ्या संख्येनं केटूएसमध्ये सहभागी होतात. ओपन कॅटेगरीत सहभागी झालेली टीम लीडर सुखदा जोशी म्हणाली, 'फिटनेस आजमावण्यासाठी केटूएससारखा दुसरा पर्याय नाही. आम्ही सगळ्या वर्किंग वुमेन यंदा प्रथमच या स्पर्धेत सहभागी होतो आहेत. सध्या केटूएसची तयारी जोरात सुरू आहे. फिटनेसमध्ये मुलीही तगडी टक्कर देऊ शकतात, हे आम्हाला दाखवून द्यायचं आहे.' एसपी कॉलेजकडून स्पर्धेत उतरलेली रसिका चव्हाण म्हणाली, 'नाइट ट्रेकचं थ्रील आणि स्पर्धा या दोन्ही गोष्टींचा समन्वय म्हणजे केटूएस. अतिशय छान पद्धतीनं आयोजित केल्या जाणाऱ्या या रेससाठी सध्या आम्ही सिंहगडला जाऊन ट्रेकिंगचा सराव करतो आहे. जिंकण्यासाठी स्वतःचा कस आजमावत केलेलं ट्रेकिंग हे या स्पर्धेचं वैशिष्ट्य आम्हाला त्यात सहभागी होण्यासाठी उद्युक्त करणारं आहे.'
केटूएस स्पर्धेची नावनोंदणी www.enduro3.com या वेबसाइटवर करता येणार आहे. २६ जुलै ही स्पर्धेच्या नावनोंदणीची अंतिम मुदत आहे.
संपर्कः देवयानी मेणकर - ७०३०९७८७७७, शंतनू फडके - ८६९८६५६५६५.
मोबाइल अॅप डाउनलोड करा आणि राहा अपडेट