आगामी गणेशोत्सवासाठी शहरातील ढोल पथकांसाठी पोलिसांकडून धोरण ठरवण्यात येणार आहे. पोलिस आणि ढोल पथके यांची आज (२३ जुलै) बैठक होणार असून, पोलिसांकडून ढोल पथकांबाबत कडक भूमिका घेतली जाण्याची अपेक्षा व्यक्त करण्यात येत आहे.
पोलिस आयुक्त के. के. पाठक, सहआयुक्त सुनील रामानंद यांच्यासह अतिरिक्त आयुक्त, सहायक आयुक्त या बैठकीला उपस्थित राहणार आहेत. गणेशोत्सवाला अद्याप दोन महिने असतानाच ढोल पथकांनी सराव सुरू केले आहेत. सराव करण्यासाठी पथकांनी पोलिस परवानाही घेतलेला नाही. पथकांच्या वादनाचा त्रास होत असल्याच्या तक्रारीही नागरिकांकडून केल्या जात आहेत. या पार्श्वभूमीवर, पोलिसांनी कारवाईही सुरू केली होती. मात्र, आता पथकांसाठी धोरण ठरवताना पोलिस काय भूमिका घेतात हे पाहणे महत्त्वाचे ठरणार आहे. ढोल पथकांसाठी या बैठकीत धोरण ठरवण्यात येणार आहे. तसेच, वादनामुळे होणारे ध्वनीप्रदूषण, सरावासाठीची वेळ, ठिकाण, ढोलांची संख्या आदी मुद्द्यांवर या बैठकीत चर्चा केली जाणार आहे.
मोबाइल अॅप डाउनलोड करा आणि राहा अपडेट