विद्यार्थ्यांच्या आंदोलनामुळे सध्या देशभरात चर्चेत असलेल्या 'फिल्म अँड टेलिव्हिजन इन्स्टिट्यूट ऑफ इंडिया'च्या (एफटीआयआय) संचालकपदी प्रशांत पाठराबे यांची शुक्रवारी नियुक्ती करण्यात आली. त्यांच्याकडे संचालकपदाचा अतिरिक्त कार्यभार देण्यात आला आहे. गेला महिनाभर सुरू असलेल्या विद्यार्थ्यांच्या आंदोलनाबाबत नवनियुक्त संचालक काय भूमिका घेतात, याकडे सर्वांचे लक्ष आहे.
गेली चार वर्षे संचालकपदी असलेल्या डी. जे. नारायण यांचा कार्यकाळ शुक्रवारी संपला. नारायण यांनी शुक्रवारी दुपारी संचालकपदाची सूत्रे पाठराबे यांच्याकडे सोपवली. पाठराबे सध्या पत्रसूचना कार्यालयाचे (पीआयबी) संचालक आहेत. यापूर्वी त्यांनी राष्ट्रीय चित्रपट संग्रहालयाचे संचालक (अतिरिक्त कार्यभार) म्हणूनही काम केले आहे.
नारायण यांचा कार्यकाल संपत असल्याने 'एफटीआयआय'च्या संचालकपदी कोणाची नियुक्ती होणार, याची उत्सुकता होती. केंद्र सरकारच्या माहिती व प्रसारण मंत्रालयाने या पदासाठी जाहिरातही दिली होती. सहा जणांच्या मुलाखती होणार असल्याची माहिती होती; मात्र विद्यार्थ्यांचा संप सुरू असल्याच्या पार्श्वभूमीवर, मंत्रालयाने या मुलाखती पुढे ढकलल्या.
'विद्यार्थ्यांच्या संपाची कल्पना आहे; मात्र नेमकी परिस्थिती समजावून घेण्यासाठी विद्यार्थ्यांशी बोलणार आहे. शक्य तितक्या लवकरच हा प्रश्न सोडवण्याचा प्रयत्न आहे. आताच कोणत्याही गोष्टीवर भाष्य करणे योग्य होणार नाही,' असे पाठराबे म्हणाले.
बऱ्याच वर्षांनी मराठी संचालक
ज्येष्ठ अभिनेते डॉ. मोहन आगाशे १९९७ ते २००२ या काळात संस्थेचे संचालक होते. त्यानंतर या पदावर एकाही मराठी अधिकाऱ्याची नियुक्ती झाली नाही. पाठराबे यांच्या रूपाने बऱ्याच वर्षांनी 'एफटीआयआय'ला मराठी संचालक लाभला आहे.
मोबाइल अॅप डाउनलोड करा आणि राहा अपडेट
