राजगुरुनगरजवळील सातकरस्थळ (ता. खेड) येथे एका बांधकाम व्यावसायिकाने ओढ्याचा नैसर्गिक प्रवाह बेकायदा अडवून पात्रातच भिंतीचे बांधकाम केले आहे. त्यामुळे ओढ्याचे पात्र अरुंद बनले आहे. त्यामुळे भविष्यात ओढ्याला पूर येऊन आजूबाजूच्या शेतीचे मोठ्या प्रमाणात नुकसान होण्याची भीती बाधित शेतकऱ्यांनी व्यक्त केली आहे.
दरम्यान, सातकरस्थळ ग्रामपंचायतीने एका ठरावाद्वारे आक्षेप घेऊन अनधिकृत बांधकाम त्वरित काढून टाकण्याची सूचना संबंधित बांधकाम व्यावसायिकाला केली होती. परंतु तरीदेखील त्याने बांधकाम सुरूच ठेवले आहे. बांधकाम व्यावसायिक ग्रामपंचायतीलादेखील जुमानत नसल्यामुळे ग्रामस्थांच्या तक्रारीनंतर खेडचे तहसीलदार प्रशांत आवटे यांनी चालू असलेले काम तातडीने बंद करण्याचे आदेश बांधकाम व्यावसायिकाला दिले. परंतु त्याचा काहीही उपयोग झाला नाही व बांधकाम चालूच असल्याचे सातकरस्थळ येथील ग्रामस्थ मारुती सातकर, अशोक नवले आदी ग्रामस्थांनी सांगितले.
मौजे सातकरस्थळ ग्रामपंचायतीच्या हद्दीत इस्माईल इब्राहीम मोमीन या बांधकाम व्यावसायिकाने जमीन सर्व्हे नं. १८९ व १९०मध्ये सुमारे सोळा हजार चौरस मीटर इतके क्षेत्र बिनशेती करून प्रत्यक्ष बांधकामाला सुरवात केली. संबंधित ठिकाणावरून एक ओढा जात आहे; मात्र व्यावसायिकाने मनमानीपणे या ओढ्याच्या पात्रातच अतिक्रमण करून संरक्षक भिंत बांधली. त्यामुळे ओढ्याचे पात्र अरुंद झाले.
मोबाइल अॅप डाउनलोड करा आणि राहा अपडेट