‘तटस्थपणे केलेल्या अभ्यासाचा सन्मान’

July 10, 2015, 2:56 pm

पुणेः 'विश्व मराठी साहित्य संमेलनाच्या अध्यक्षपदी निवड होणे ही घटना आनंददायीच आहे. मात्र, स्वातंत्र्यवीर सावरकरांच्या विचार व साहित्याचा तर्कशुद्धपणे व तटस्थपणे केलेल्या अभ्यासाचा हा सन्मान आहे,' अशी भावना नवनिर्वाचित संमेलनाध्यक्ष डॉ. शेषराव मोरे यांनी व्यक्त केली.

अंदमान येथे विश्व मराठी साहित्य संमेलनाच्या अध्यक्षपदी निवड झाल्यानंतर त्यांनी माध्यमांशी संवाद साधला. त्या वेळी ते बोलत होते. देशासाठी मोठा त्याग केलेल्या स्वातंत्र्यवीरांच्या स्मृती सुवर्णमहोत्सवी वर्षांत विश्व मराठी साहित्य संमेलन अंदमान येथे आयोजित होत असल्याबद्दलही त्यांनी आनंद व्यक्त केला.

'सावरकरांचे विचार आज देशाला आवश्यक आहेत. त्यांनी धर्मनिरपेक्ष, अंधश्रद्धा विरोधी, भाषा शुद्धी, सामाजिक विकास आदी विषयांवर मौलिक विचार मांडले आहेत. मात्र, सावरकर समाजाला कळलेच नाहीत. त्यांचे विचार कालबाह्य झालेले नाहीत,' असेही मोरे यांनी सांगितले. कविवर्य ना. धों. महानोर यांनी राज्यात दुष्काळ असल्याने संमेलनाध्यक्षपद स्वीकारणार नसल्याचे महामंडळाला सांगितले होते. त्याबाबत मोरे म्हणाले, 'जीवनात दुःखाची नेहमीच कारणे असतात. मग, आनंद साजरा करायचाच नाही का? दुःखी असतानाही वारकरी पंढरीची वारी करतातच. त्यामुळे दुष्काळाचे दुःख विसरण्यासाठी अंदमानच्या संमेलनात सहभागी व्हायचे. अंदमान ही साहित्याची पंढरीच आहे.'

'रुढार्थाने मी साहित्यिक नाही'

'संमेलनाध्यक्षपदासाठी माझे नाव पुढे आल्यावर महामंडळाला मी रुढार्थाने साहित्यिक नसल्याचे कळवले होते. आजपर्यंत मी कथा, कविता, कादंबरी, ललित लेख असे साहित्य लिहिलेले नाही. मात्र, राज्यशास्त्र, समाजशास्त्र, इतिहास, कायदा हे साहित्याचे विषय नाहीत का, की कथा, कविता, कादंबरी हेच साहित्य आहे?,' असा सवाल विश्व मराठी साहित्य संमेलनाचे नवनिर्वाचित अध्यक्ष डॉ. शेषराव मोरे यांनी उपस्थित केला.

Latest Images