संत तुकाराम महाराजांच्या पालखीचे जल्लोषात स्वागत
म. टा. प्रतिनिधी, पिंपरी
दिंड्या-पताकांचे भार...टाळ-मृदुंगाची लय अन् त्यात हिंदोळणारा रथाचा कळस...सोबत अलोट वारकरी समुदाय... निगडीतील भक्ती-शक्ती चौकात संत तुकाराम महाराजांची पालखी दिसताच 'ज्ञानोबा माउली तुकाराम'चा गजर झाला आणि संपूर्ण उद्योगनगरी भक्तिरसात चिंब झाली. विठ्ठलाच्या ओढीने पंढरपूरच्या दिशेने निघालेली संत तुकाराम महाराजांची पालखी देहूकरांचा निरोप घेऊन गुरुवारी सायंकाळी साडेपाचच्या सुमारास पिंपरीत दाखल झाली.
गळ्यांत तुळशीमाळा, कपाळी बुक्का, कानाच्या दोन्ही पाळ्यांना गोपीचंदन, खांद्यावर भगव्या पताका आणि हातात टाळ-मृदुंगासह विठ्ठल नामाचा जयघोष करीत पंढरीच्या दिशेने निघालेल्या वारकऱ्यांमध्ये तुकोबांची लक्ष लक्ष रूपे दिसत होती. 'भक्ती-शक्ती' चौकापासून दुपारी अडीच वाजल्यापासून वारकरी शहरात दाखल होण्यास सुरुवात झाली होती. पालखीसोबत ३२६ दिंडया होत्या.
सर्वांत पुढे सनई-चौघडा, तुकोबांच्या पालखीचे अश्व, मागे फुलांनी सजविलेल्या चांदीच्या रथातील महाराजांच्या पादुकांची पालखी, त्यानंतर जगनाडे महाराज, गवरशेठ लिंगायत वाणी पालखी या क्रमाने पालख्या होत्या. सोहळ्याच्या स्वागतासाठी पिंपरी-चिंचवड महापालिकेतर्फे भक्ती-शक्ती चौकात स्वागत कक्ष उभारण्यात आला होता. शहराच्या वेशीवर पालखी येताच अप्पर पोलिस आयुक्त प्रकाश मुत्याळ, उपायुक्त डॉ. बसवराज तेली यांनी पुष्पहार अर्पण करून दर्शन घेतले. पालखी शहरात दाखल होताच आमदार महेश लांडगे, उपमहापौर प्रभाकर वाघेरे यांनी पालखीचे सारथ्य केले. या वेळी महापौर शकुंतला धराडे, खासदार श्रीरंग बारणे, गौतम चाबुकस्वार, आयुक्त राजीव जाधव, उपमहापौर प्रभाकर वाघेरे, विरोधी पक्षनेते विनोद नढे, माजी महापौर अपर्णा डोके, नगरसेविका साधना जाधव, आरंती चौंधे, आशा सूर्यवंशी, शारदा बाबर, सुलभा उबाळे, नगरसेवक नाना लोंढे, नारायण बहिरवाडे, संदीप चिंचवडे, मोरेश्वर भोंडवे, दत्ता साने, धनंजय आल्हाट, अरुण टाक, नाना काटे, उल्हास शेट्टी, कैलास थोपटे, शिक्षण मंडळ सभापती धनंजय भालेकर, सदस्य विजय लोखंडे; तसेच महापालिकेचे पदाधिकारी व अधिकारी मोठ्या संख्येने उपस्थित होते.
हा भक्तीचा सोहळा प्रत्यक्ष अनुभवण्यासाठी निगडी चौकात पिंपरी-चिंचवडमधील नागरिकांनी अलोट गर्दी लोटली होती. कडेकोट बंदोबस्तात शिस्तीत भाविकांनी दर्शन घेतले. त्यानंतर पालखी आकुर्डी येथील विठ्ठल मंदिरात मुक्कामी दाखल झाली. आकुर्डी मंदिरात दर्शनासाठी भाविकांची मोठी गर्दी झाली होती.
सर्वांनी धरला फेर
पालखी सोहळ्यातील हरिनामाच्या गजरासोबत फुगडी खेळण्याचा आनंद निराळाच असतो. हा आनंद पिंपरी-चिंचवड महापौलिकेच्या महापौर शकुंतला धराडे, आमदार महेश लांडगे, आयुक्त राजीव जाधव आणि उपस्थित नगरसेक-नगरसेविकांनीही लुटला. महापौरांनी महिला नगरसेवकांसोबत फुगडीचा फेर धरला. नवनगर विकास प्राधिकरणाने वेगळा स्वागतकक्ष उभारला होता. मुख्य कार्यकारी अधिकारी सुरेश जाधव यांनी स्वागत केले.
चिक्की, फळांचे वाटप
काँग्रेस, शिवसेना या पक्षांसह विविध स्वयंसेवी संघटनांनी वारकऱ्यांना गुडदाणी, पाणी, चहा, खिचडी, फळे, बिस्किट अशा विविध वस्तूंचे वाटप केले. तर, काँग्रेस शहराध्यक्ष सचिन साठे, कैलास कदम यांनी वारकऱ्यांना चिक्कीचे वाटप केले. 'शिवमुद्रा प्रतिष्ठान'ने कमान उभारून पालखीवर पुष्पवृष्टी केली. शहरातील विविध शाळांमधील विद्यार्थी सहभागी झाले होते. विद्यार्थ्यांनी भजन सादर केले.
मोबाइल अॅप डाउनलोड करा आणि राहा अपडेट