म. टा. प्रतिनिधी, पुणे
'पक्षाच्या नगरसेवकांनी प्रभागांमध्ये चांगले काम केले आहे; पण शहरासाठी अधिक व्यापक दृष्टिकोन ठेवून काम करण्याची गरज आहे,' अशा शब्दांत राष्ट्रवादी काँग्रेसचे अध्यक्ष शरद पवार यांनी पालिकेतील पक्षाच्या लोकप्रतिनिधींना शुक्रवारी चार खडे बोल सुनावले. तसेच, केंद्र आणि राज्यात कोणत्याही पक्षाचे सरकार असले, तरी शहराचा विकास थांबता कामा नये, अशी अपेक्षा त्यांनी भाजप सरकारकडून व्यक्त केली.
शहरातील सर्व नगरसेवक, खासदार आणि आमदार यांची आढावा बैठक पवार यांच्या अध्यक्षतेखाली झाली. या बैठकीत प्रत्येक नगरसेवकाच्या कामाचा आढावा घेतल्यानंतर स्थानिक पातळीवर चांगले काम सुरू असले, तरी शहराचा एकत्रित विचार केला पाहिजे, अशा सूचना पवार यांनी दिल्या. या बैठकीनंतर पत्रकारांशी बोलतानाही, पवार यांनी शहराच्या सर्वंकष विकासाकरिता प्रलंबित प्रश्नांबद्दल केंद्र आणि राज्य सरकारच्या मंत्र्यांशी, अधिकाऱ्यांशी चर्चा करणार असल्याचे स्पष्ट केले. शहराचा विकास आराखडा राज्य सरकारने ताब्यात घेतला असून, त्याबाबत सरकार काय निर्णय घेणार, याकडे राष्ट्रवादीचे लक्ष असेल, असे त्यांनी सांगितले.
पाऊस कमी होण्याची शक्यता गृहित धरून शहरातील पाण्यासाठी आत्तापासूनच नियोजन करणे गरजेचे असल्याचे मत त्यांनी व्यक्त केले. कचरा प्रश्न सोडविण्यासाठी छोट्या-छोट्या स्तरांवर कचरा प्रकल्प उभारणे गरजेचे असून, राज्य सरकारनेही पालिकेला जागा देऊन मदत करावी, असे त्यांनी सुचविले. 'राज्य सरकारने स्थानिक संस्था कर बंद करण्याचा निर्णय घेताना, पालिकेला अनुदान देण्याचे निश्चित केले आहे. हे अनुदान वेळेत मिळाले नाही, तर प्रश्न निर्माण होतील', याकडे त्यांनी लक्ष वेधले.
शिक्षण मंडळ पदाधिकाऱ्यांना अभय
लाचखोरी प्रकरणात अटक झालेल्या शिक्षण मंडळाच्या पदाधिकाऱ्यांची पवार यांनीही पाठराखणच केली. कोर्टात दोषारोपपत्र दाखल झाल्यानंतर सर्व पुरावे समोर येतील. त्यामध्ये कितपत तथ्य आहे, हे पाहूनच निर्णय घेण्यात येईल, असे पवार यांनी सांगितले.
'तळे राखतो, तो पाणी चाखतो'
पुण्याचा मेट्रो प्रकल्प केंद्र सरकारकडे मंजुरीसाठी आधी जाऊनही नागपूरच्या मेट्रोला पुण्यापूर्वी मंजुरी देण्यात आली. त्यावरून, विरोधकांकडून सातत्याने टीका होत असताना, पवार यांनी मात्र 'तळे राखतो तो पाणी चाखतो' या न्यायाने मुख्यमंत्री, केंद्रीय मंत्र्यांमुळे नागपूरला झुकते माप मिळाल्याचे सांगितले. केंद्रात असतो, तर पुण्याकडे लक्ष देता आले असते, असेही त्यांनी नमूद केले. पुणे मेट्रोला मान्यता मिळावी, या मागणीसाठी रेल्वेमंत्री सुरेश प्रभू यांची लवकरच भेट घेणार असल्याचे पवार यांनी जाहीर केले.
नगरसेवकांना घरचा आहेर
शहरामध्ये काही नगरसेवक अधिकाऱ्यांना हाताशी धरून बांधकाम परवानग्यांमध्ये नागरिकांना नाहक त्रास देत असल्याचे निदर्शनास आले असून, या नगरसेवकांची कोणतीही गय केली जाणार नाही, असा इशारा पवार यांनी बैठकीदरम्यान दिल्याचे समजते. बांधकाम नकाशांपासून ते जोते तपासणी दाखला, भोगवटा प्रमाणपत्र अशा विविध टप्प्यांवर अडचणींचा सामना करावा लागत असून, नगरसेवक-अधिकाऱ्यांची युती त्यासाठी कारणीभूत असल्याची माहिती आपल्यापर्यंत पोहोचली आहे. याला वेळीच आळा घाला; अन्यथा कारवाईला सामोरे जा, असा थेट दम पवार यांनी सर्वांना भरला.
मोबाइल अॅप डाउनलोड करा आणि राहा अपडेट
