म. टा. प्रतिनिधी, बारामती
इंदापूर तालुक्यातील लाखेवाडी येथे शेतजमीन व रस्त्याच्या जुन्या वादातून एका दलित कुटुंबावर शुक्रवारी सायंकाळी चार वाजण्याच्या सुमारास प्राणघातक हल्ला झाला. या हल्ल्यात विलास भिंगारदिवे यांच्या कुटुंबातील महिला व मुलांसह ११ जण जखमी झाले असून, त्यापैकी तीन जण गंभीर आहेत. या प्रकरणी आरोपींवर अॅट्रॉसिटीसह अन्य गुन्हे दाखल करण्यात आले आहेत.
विलास रघुनाथ भिंगारदिवे (वय ५०), जानकी विलास भिंगारदिवे (४५), रघुनाथ दादा भिंगारदिवे (७०), दिलीप विलास भिंगारदिवे (१९), प्रदीप विलास भिंगारदिवे (२९), जया समाधान कांबळे (३५), समाधान मल्हारी कांबळे (४०), पुष्पा प्रदीप भिंगारदिवे (२५) तसेच तीन मुलेही जखमी झाली आहेत. त्यांच्यावर बावडा प्राथमिक आरोग्य केंद्रात उपचार करण्यात येत आहेत. प्रदीप, दिलीप आणि समाधान यांना गंभीर दुखापत झाल्याने त्यांना इंदापूर जिल्हा उपरुग्णालयाध्ये दाखल करण्यात आले आहे.
या प्रकरणी विलास भिंगारदिवे यांनी पोलिसांत फिर्याद दाखल केली असून, राजेंद्र उर्फ राजू बाळकृष्ण शिंगाडे, संजय बाळकृष्ण शिंगाडे, किरण दीपक खुरंगे, महादेव पांडुरंग खुरंगे, विलास पांडुरंग खुरंगे यांच्यासह १५ ते २० जणांविरोधात गुन्हा दाखल करण्यात आला आहे. अद्यापपर्यंत एकाला अटक करण्यात आली असल्याचे उपविभागीय पोलिस अधिकारी राजेंद्र मोरे यांनी सांगितले.
या गुन्ह्यात आरोपींनी लोखंडी खिळे ठोकलेली लाकडी दांडकी, लोखंडी पाईप तसेच गजाचा मारहाणीसाठी वापर केला. गुन्ह्यात वापरलेले साहित्य पोलिसांनी घटनास्थळावरून जप्त केले आहे. भिंगारदिवे कुटुंब बावडा येथील प्राथमिक आरोग्य केंद्रात उपचार घेत असतानाच संशयित आरोपींनी त्यांच्या घरालगतची स्वयंपाकाची झोपडी पेटवून दिली.
भिंगारदिवे वस्तीनजिक असलेल्या जमिनीत काही धनदांडग्यांनी अतिक्रमण केल्याच्या तसेच रहदारीचा रस्ता अडविल्याच्या कारणावरून विलास भिंगारदिवे यांचा किरण खुरंगे व शिंगाडे यांच्यामध्ये वाद होता. त्यातूनच हा प्रकार घडला. या घटनेच्या निषेर्धाथ लाखेवाडी येथे बंद पाळण्यात आला, तर इंदापूर पोलीस ठाण्यासमोर पुणे-सोलापूर महामार्गा वर आंदोलकांनी 'रास्ता रोको' आंदोलन करण्यात आले. बावडा पोलिस दूरक्षेत्राचे सहाय्यक निरीक्षक प्रशांत काळे यांनाही या गुन्ह्यात सहआरोपी करून निलंबित करण्याची मागणी आंदोलनकर्त्यांनी केली.
नेमका प्रकार काय?
भिंगारदिवे वस्तीनजिक असलेल्या जमिनीत काही धनदांडग्यांनी अतिक्रमण केल्याच्या तसेच रहदारीचा रस्ता अडविल्याच्या कारणावरून विलास भिंगारदिवे यांचा किरण खुरंगे व शिंगाडे यांच्यामध्ये वाद होता. त्यातूनच हा प्रकार घडला.
मोबाइल अॅप डाउनलोड करा आणि राहा अपडेट
