पावसाळ्यात सोसायट्यांच्या आवारात साठलेल्या पाण्यात डेंगीच्या डासांची उत्पत्ती होण्याची शक्यता असते. त्या दृष्टीने खबरदारी घेण्याची गरज आहे.
म. टा. प्रतिनिधी, पुणे
पावसाळ्यात घर, सोसायटी, बागा, रस्ते, भंगार साहित्य या ठिकाणी साचलेल्या पाण्यामध्ये डेंगीच्या डासांची उत्पत्ती होण्याची शक्यता अधिक असते. त्यामुळे शहरातील सोसायट्यांनो, सावधान...! सोसायटीमध्ये डेंगीच्या डासांची उत्पत्ती आढळल्यास तुम्हाला पालिकेच्या आरोग्य विभागाच्या दंडात्मक कारवाईला सामोरे जावे लागण्याची शक्यता आहे. आतापर्यत शहरातील दोन हजारांहून अधिक सोसायट्यांना याबाबत नोटिसा पाठविण्यात आल्या आहेत. त्याशिवाय पाचशेहून अधिक बांधकाम व्यावसायिकांना नोटिसा पाठवून त्यांना दक्षता घेण्याचे आदेश बजावले आहेत.
गेल्या वर्षी डेंगीच्या 'एडिस इजिप्ती' नावाच्या विषाणूंनी पुणेकरांसह राज्यातील जनतेला चांगलाच डंख मारला होता. डेंगीच्या विषाणूचे बदलले स्वरूप सामान्य पेशंटच्याच काय तर डॉक्टरांच्याही लक्षात आले नाहीत. डेंगीचा उद्रेक वाढत असताना त्याचे गांभीर्य वाढले. पालिकेच्या झोपलेल्या प्रशासनाने त्या वेळी तत्काळ उपाययोजना हाती घेऊन त्याची अंमलबजावणी सुरू केली. शहराच्या मध्यवर्ती भागांप्रमाणेच भवानी पेठ, सहकारनगर, बिबवेवाडी, हडपसर, स्वारगेट, औंध, बाणेर, पाषाण, नगर रस्ता यासारख्या शहराच्या बाहेरील भागांमध्ये डेंगीने चांगलेच डोके वर काढले होते. घरांसह सोसायट्यांच्या आवारात कचरा कुंडीपासून ते भंगार साहित्यांमध्ये पावसाचे पाणी साचून डेंगीच्या डासांची उत्पत्ती झाल्याचे आढळून आले. पुण्यात साडेतीन हजारांपेक्षा अधिक जणांना डेंगीची लागण झाली होती. साधा ताप आला तरी जनरल प्रॅक्टिशनर्सकडून डेंगीचा पेशंट म्हणून नोंद केली जात होती. डेंगीवर साध्या 'क्रोसिन'च्या औषधांशिवाय फारसे अन्य काही उपचार नव्हते. मात्र, डेंगीच्या पेशंटमध्ये 'प्लेटलेट' कमी झाल्याने त्या पेशंटचा जीव धोक्यात येत होता. त्यामुळे रक्तदात्यांसह रक्तपेढ्यांची देखील पळापळ झाली याचा उल्लेख करावा लागेल. हे सांगण्याचे तात्पर्य एवढेच की, गेल्या वर्षी प्रशासनासह राज्याच्या आरोग्य विभागाची उडालेली धांदल उडू नये यासाठी काळजी घेण्यात येत आहे.
पालिकेच्या आरोग्य विभागाने मे महिन्यापासूनच शहरातील ७१ हजार झोपडपट्ट्यांमध्ये औषध फवारणी करण्यात आली आहे. पालिकेच्या आरोग्य विभागाचे कर्मचारी सोसायट्यांमध्ये देखील औषध फवारणी आणि डेंगीच्या डासांची उत्पत्तीस्थाने शोधण्यासाठी जात असतात. मात्र, शहरातील सोसायट्यातील रहिवाशी कर्मचाऱ्यांना सोसायटीत प्रवेश करू देत नाहीत. त्यांना चोर अथवा तोतया समजून सोसायटीच्या गेटच्या बाहेरून पाठवितात. त्यामुळे सोसायटीतील नागरिकांच्या आरोग्याची काळजी घेण्याच्या हेतूने आलेल्या कर्मचाऱ्यांना रहिवाशांनी मदत करण्याची अपेक्षा आहे, याची जाणीव आता सोसायट्यांनी ठेवली पाहिजे. प्रत्येक वेळी पालिकेच्या आरोग्य विभागाला दोष देणे हे योग्य राहणार नाही. यात आता सामान्य पुणेकरांची देखील जबाबदारी वाढली आहे. वैयक्तिक ते घरापासून आणि सोसायट्यांपासून ते शहराच्या प्रत्येक भागात स्वच्छता राखण्याची गरज निर्माण झाली आहे. यासाठी आता सोसायट्याच्या पदाधिकाऱ्यांपासून ते प्रत्येक रहिवाशांनी याबाबत पावसाळ्यात डेंगी किंवा अन्य आजाराच्या साथी येण्याची वाट न पाहता उपाययोजना करायला हव्यात.
यंदाच्या वर्षी पालिकेच्या आरोग्य विभागाने झोपडपट्टीसह शहरातील सोसायट्यांमध्ये कर्मचारी औषध फवारणीसाठी पाठविले होते. मात्र, कर्मचाऱ्यांना पुन्हा हात हलवित परत माघारी फिरावे लागले. रहिवाशांनी त्यांना कामच करू न दिल्याचा अनुभव आहे. तरीही आरोग्य कर्मचाऱ्यांनी सोसायट्यांना डेंगीच्या डासांची उत्पत्ती होऊ नये याबाबत दक्षता घ्यावी यासाठी सोसायट्यांना नोटिसा देऊ केल्या आहेत. यंदाही शहरातील प्रत्येक भागातील सोसायट्यांवर लक्ष केंद्रित करण्यात आले. त्याशिवाय औंध, बाणेर, पाषाण, कोथरूड, हडपसर, मुंढवा, कात्रज कोंढवा, वानवडी, धनकवडी, सहकारनगर, बिबवेवाडी, सिंहगड रोड सारख्या भागांवर अधिक लक्ष केंद्रित करण्याचा मानस पालिकेच्या आरोग्य विभागाने व्यक्त केला आहे. या भागात स्वच्छतेचा अभाव, बांधकामांचे वाढते प्रमाण यामुळे पावसात पाणी साचण्याचे प्रमाण अधिक आहे. त्यामुळे डासांची निर्मिती या भागात अधिक होत असल्याचे निरीक्षण गेल्या वर्षी नोंदविण्यात आले होते. त्यामुळे सोसायट्यांमध्ये जागृती करण्यासाठी आपार्यंत अडीच हजार सोसायट्यांपेक्षा अधिकांना आरोग्य विभागाने नोटिसा दिल्या आहेत. या कारवाईपेक्षा तुम्हीच तुमच्या आरोग्याची काळजी घेण्यासाठी दोन पावले पुढे आला तर तुम्हाला लागणाऱ्या आरोग्याच्या सोयी सुविधा पालिका देण्यास तयार आहे. त्यासाठी सोसायटीतील बागांमध्ये, कुंड्यासह कचरा, भंगाराच्या साहित्यात पावसाचे पाणी साचू न देता त्यांमध्ये डासांची उत्पत्ती होणार नाही याची काळजी घेतली पाहिजे. तरच यंदाच्या वर्षी सोसायट्यांमधून डेंगी हद्दपार होईल अन्यथा तुमच्या पैकी कोणाच्याही सोसायटीतील रहिवाशांना डासांची लागण झाल्याशिवाय राहणार नाही याचे गांभीर्य ओळखणे गरजेचे आहे.
मोबाइल अॅप डाउनलोड करा आणि राहा अपडेट
