म. टा. प्रतिनिधी, पुणे
'मॅगी' नूडल्सवर महाराष्ट्र सरकारने बंदी घातल्यानंतर कंपन्यांकडे माल परत पाठविण्यास सुरुवात झाली आहे. त्यामुळे पुणे विभागातून आतापर्यंत तीन कोटी १४ लाख रुपयांचा 'मॅगी'चा साठा कंपनीकडे परत पाठविण्यात आला आहे.
राज्यात मॅगीच्या नमुन्यात शिसाचे प्रमाण आढळले. त्यामुळे अन्न व औषध प्रशासन (एफडीए) खात्याचे मंत्री गिरीश बापट यांनी मॅगीवर बंदी लागू केल्याचे जाहीर केले. त्यामुळे पुण्यासह राज्यातील विविध मोठ्या मॉलमधून मॅगी हद्दपार झाली; तर छोट्या-मोठ्या वितरकांकडे असलेला मॅगीचा साठा परत कंपनीकडे पाठविण्याची कारवाई एफडीएने सुरू केली. पुणे विभागातही अशा प्रकारची कारवाई करण्यात आली.
'पुणे विभागातून गेल्या आठवड्यापासून मॅगीचा साठा परत पाठविण्याची कारवाई सुरू केली आहे. अन्न सुरक्षा अधिकाऱ्यांमार्फत सर्व वितरकांकडे मॅगीच्या साठ्याची तपासणी करण्यात आली. शहर जिल्ह्यात मॅगीचे १९ वितरक आहेत. या तपासणींतर्गत १६ जूनपर्यंत तीन कोटी १३ लाख ८१ हजार ३६३ रुपयांच्या मॅगीचा साठा कंपनीकडे पाठविण्यात यश आले आहे,' अशी माहिती सहायक आयुक्त दिलीप संगत यांनी दिली.
सर्वाधिक साठा पुण्यात
पुणे विभागात पुणे शहरात एक कोटी ६९ लाख ३८ हजार ५३६ रुपयांचा सर्वाधिक मॅगीसाठा आढळला; तर एक लाख दोन हजार ५४६ किलो एवढा साठा आढळला. सोलापूर, सांगली जिल्ह्यात सर्वाधिक कमी साठा आढळला. सोलापूरमध्ये १० हजार १७६ किलो वजनाचा आणि तेरा लाख सहा हजार रुपये किमतीचा; तर सांगलीमध्ये २९ हजार ५९४ वजनाचा आणि २६ लाख ७ हजार ३७० रुपयांचा साठा आढळला. हा सर्व साठा कंपनीकडे आतापर्यंत पाठविण्यात आला आहे.
मोबाइल अॅप डाउनलोड करा आणि राहा अपडेट