पुणे महानगर परिवहन महामंडळाने (पीएमपी) सोमवारपासून विद्यार्थ्यांसाठीच्या विशेष बसेसमध्ये वाढ केली आहे. मागील वर्षी विद्यार्थ्यांसाठी खास ४० बस सोडल्या जात होत्या. त्यामध्ये आता आणखी आठ बसेसची भर पडली असून त्यामुळे १६ फेऱ्या वाढणार आहे.
शालेय विद्यार्थ्यांच्या खासगी वाहतुकीपेक्षा पीएमपीने प्रवास करणाऱ्या विद्यार्थ्यांची संख्या जास्त आहे. त्यामुळे बसमध्ये चढण्यासाठी विद्यार्थ्यांची मोठ्या प्रमाणावर असलेली गर्दी आणि बसला लटकलेले विद्यार्थी असे चित्र नेहमीच पाहायला मिळते. त्यामुळे विद्यार्थ्यांची होणारी गैरसोय टाळण्यासाठी पीएमपी प्रशासनाने बस वाढविण्याचा निर्णय घेतला. पीएमपीने पालिकेच्या २६ शाळांसह १४ खासगी शाळांतील विद्यार्थ्यांसाठी स्वतंत्रपणे एकूण ५५ बस दिल्या आहेत. येथून पुढे शाळांच्या वेळेत फक्त विद्यार्थ्यांसाठी ४८ बस सोडल्या जाणार आहेत. या बसमध्ये पास असलेले किंवा तिकीट काढून प्रवास करणारे विद्यार्थी प्रवास करू शकतात, असे पीएमपी प्रशासनाने स्पष्ट केले.
.......
टिळक रस्ता, बाजीराव रोड, शिवाजी रोड, हडपसर, सिंहगड रोड, कर्वे रस्ता आणि अन्य काही मार्गांवर सकाळी व सायंकाळी बसस्थानकांवर विद्यार्थ्यांंची गर्दी होते. पीएमपीतर्फे गेल्या काही वर्षांपासून विद्यार्थ्यांसाठी जादा बस सोडल्या जातात. मात्र, मागील वर्षीपर्यंंत ही संख्या अपुरी होती. या वर्षी या बसेसमध्ये वाढ करण्यात आली आहे.
-अनंत वाघमारे, पीएमपी वाहतूक व्यवस्थापक
मोबाइल अॅप डाउनलोड करा आणि राहा अपडेट