म. टा. प्रतिनिधी, पुणे
अकरावीच्या प्रवेश प्रक्रियेतील सांस्कृतिक कोट्यातील प्रवेशांसाठीच्या आवश्यक प्रमाणपत्रांची छाननी करण्याची जबाबदारी मुख्याध्यापकांवर सोपविण्यात आली आहे. अशा प्रवेशांसाठी पात्र विद्यार्थ्यांची माहिती राज्य सांस्कृतिक कार्य संचालनालयाने पुणे विभागीय शिक्षण उपसंचालकांकडे पाठविली असून, ही यादी अकरावी प्रवेशासाठीच्या http://pune.fyjc.org.in या वेबसाइटवरही उपलब्ध करून देण्यात आली आहे.
अकरावीच्या प्रवेश प्रक्रियेत विविध सांस्कृतिक स्पर्धांच्या आणि उपक्रमांच्या माध्यमातून उल्लेखनीय कामगिरी नोंदविणाऱ्या विद्यार्थ्यांसाठी कॉलेज पातळीवर दोन टक्के जागा राखीव ठेवल्या जातात. अशा जागांवर प्रवेश घेण्यासाठी राज्य सांस्कृतिक कार्य संचालनालयाचे संबंधित कला प्रकारातील प्राविण्याचे प्रमाणपत्र सादर करणे विद्यार्थ्यांना बंधनकारक करण्यात आले आहे. गेल्या काही दिवसांपासून असे प्रमाणपत्र असणाऱ्या विद्यार्थ्यांच्या प्रमाणपत्रांची पडताळणी करण्याबाबत प्रश्नचिन्ह उपस्थित झाले होते. तसेच, या कोट्यातून प्रवेश मिळाल्यानंतर, पुढच्या टप्प्यात प्रमाणपत्र पडताळणीमध्ये काही गोंधळ झाल्यास संबंधित विद्यार्थ्यांचा प्रवेश त्याच कॉलेजमध्ये राहणार की रद्द होणार, या बाबतही प्रश्न उपस्थित केला जात होता. त्या पार्श्वभूमीवर पुणे विभागीय शिक्षण उपसंचालक आणि अकरावी केंद्रीय ऑनलाइन प्रवेश समितीचे अध्यक्ष रामचंद्र जाधव यांनी बुधवारी त्या विषयीची माहिती दिली.
सांस्कृतिक कार्य संचालनालयाने संगीत, नृत्य, नाट्य क्षेत्रात प्राविण्य प्रमाणपत्र मिळविलेल्या, राज्य नाट्य, बालनाट्य, व्यावसायिक नाट्य स्पर्धेत अभिनयाचे पारितोषिक मिळविलेल्या विद्यार्थी- विद्यार्थिनींची प्रमाणित यादी सॉफ्ट कॉपीच्या माध्यमातून उपसंचालक कार्यालयाकडे उपलब्ध करून दिली आहे. मुख्याध्यापकांनी सांस्कृतिक कोट्यातून अर्ज भरू इच्छिणाऱ्या विद्यार्थ्यांकडील प्रमाणपत्रांची या यादीच्या आधारे पडताळणी करून, संबंधित विद्यार्थ्यांचे अर्ज अंतिम करावेत, असे उपसंचालक कार्यालयाच्या प्रसिद्धीपत्रकात बुधवारी सांगण्यात आले.
आठ हजारांवर अर्ज 'फायनल'
अकरावीच्या ऑनलाइन प्रवेश प्रक्रियेतून बुधवार अखेर आठ हजार २० विद्यार्थ्यांनी आपले अंतिम अर्ज प्रवेश समितीकडे सादर केले. एकूण ५५ हजार ८६४ विद्यार्थ्यांनी प्रक्रियेसाठी अर्ज भरले असून, त्यापैकी ३८ हजार ३८८ विद्यार्थ्यांनी अर्ज अॅप्रूव्ह करून घेतल्याचे समितीकडून सांगण्यात आले.
मोबाइल अॅप डाउनलोड करा आणि राहा अपडेट