पुण्याला मान्सूनचे वेध लागले असतानाच नगररोड परिसराला सोमवारी दुपारनंतर मुसळधार पावसाने झोडपले. अवघ्या काही तासांत तब्बल ५२ मिलिमीटर पावसाची नोंद. स्थानिक पातळीवरील हवामान आणि वाढलेल्या बाष्पामुळे झालेल्या या पावसाने संपूर्ण नगररोड परिसरातील उपनगरांमध्ये वाहतुकीची मोठी कोंडी झाली. अनेक सोसायट्या-वस्त्यांमध्ये पाणीदेखील घुसले. शहरात इतरत्र मात्र किरकोळ शिडकावाच झाला.
पुण्यात गेल्या अनेक दिवसांपासून हवामान ढगाळ असले, तरी तापमानात वाढ झालेली आहे. येरवडा, लोहगाव, नगररोड परिसरातही तापमान ३५ अंशांच्या आसपास होते. त्यामुळे स्थानिक पातळीवर झालेली तापमानवाढ तसेच अरबी समुद्रातील 'आशोबा' चक्रीवादळामुळे हवेतील बाष्पाचे प्रमाण वाढून स्थानिक पातळीवर हा जोरदार पाऊस झाल्याचे हवामानतज्ज्ञांनी सांगितले. शहरात अन्यत्र कमी अधिक प्रमाणात पावसाचा शिडकावा झाला. मात्र, शहरातील तापमानात काहीशी घट झाल्याने हवेतील गारवा वाढला होता. शहरात सोमवारी ३४.६ अंश सेल्सियस इतके कमाल तर २०.३ अंश सेल्सियस इतके किमान तापमान नोंदले गेले.
नगररोड, वडगांव शेरी भागात ठिकठिकाणी गुडघाभर पाणी साचल्याने अनेक वाहने बंद पडली. सायंकाळी सर्वत्र वाहतूक कोंडी झाली होती. वाहतूक पोलिस गैरहजर असल्याने कोंडीत आणखी भर पडली. स्थानिक तरूणांनी रस्त्यावर उतरून ही कोंडी फोडण्यास मदत केली. सोमवारी दुपारी चारनंतर येरवडा उपनगरात जोरदार पावसाला सुरुवात झाली. काही वेळातच नगररोड ,वडगाव शेरी, लोहगांव, विश्रांतवाडी, येरवडा, कळस या भागात ठिकठिकाणी पाणी साचले होते. नगररोडवरील फिनिक्स मॉलसमोर पावसामुळे गुडघाभर पाणी साचले होते. नगररोड पूर्णतः वाहतूक कोंडी झाल्याने येरवडा, विश्रांतवाडी, विमाननगर, खराडी परिसरातील मुख्य आणि अंतर्गत रस्त्यांवरही कोंडी झाली होती.
सोसायट्यांत घुसले पाणी
दर वर्षी प्रमाणे यंदाच्या वर्षीही वडगाव शेरीतील सैनिक वाडी, उज्ज्वल गार्डन सोसायटी, गणराज सोसायटी, आनंदा हाईट्स, राजश्री कॉलनी, मुनुरवार सोसायटी, राजेंद्रनगर, शुभम सोसायटी या भागात पावसाचे पाणी नागरिकांच्या घरात घुसले. सोसायट्यांच्या आवारातही पाणी साचले होते. या पाण्यात मैलापाणी एकत्र होऊन हे पाणी सोसायटीच्या पार्किंगमध्ये तसेच तळ मजल्यावरील घरात पाणी घुसल्याने नागरिकांचे हाल झाले. पहिल्या पावसातच पाणी घरात शिरल्याने मान्सूनचे पुढील चार महिने कसे जाणार या विचारानेच स्थानिक नागरिक धास्तावले आहेत.
पाऊस कायम राहणार
मान्सून तळकोकणात दाखल झाला आहे. कोकणच्या उर्वरित भागात मान्सूनची आगेकूच होण्यासाठी हवामान अनुकूल आहे. तसेच अरबी समुद्रातील चक्रीवादळामुळे राज्याकडे बाष्पयुक्त वारेही वाहात आहेत. त्यामुळे पुढील चार दिवसांत शहराच्या काही भागात मेघगर्जनेसह पावसाची शक्यता वर्तविण्यात आली आहे.
मोबाइल अॅप डाउनलोड करा आणि राहा अपडेट
