पुण्यासह मुंबई, मराठवाड्यात रविवारी सकाळी पूर्वमोसमी पावसाने जोरदार हजेरी लावली. मराठवाड्यात वीज पडून पाच जणांचा मृत्यू झाला. पुढील तीन दिवस पुण्याच्या काही भागात मेघगर्जनेसह पावसाची शक्यता वर्तविण्यात आली आहे.
शहरात सायंकाळी साडेपाचपर्यंत १८ मिलिमीटर तर लोहगाव येथे १० मिमी पावसाची नोंद झाली. अवघ्या अर्धा तास झालेल्या जोरदार पावसामुळे अनेक ठिकाणी तळी साचली होती. शहराच्या मध्यवर्ती भागासह कोथरूड, वारजे, कात्रज, हडपसर, पाषाण, लोहगाव या भागात पावसाच्या जोरदार सरी कोसळल्या. शहरात सकाळपासूनच ढगाळ वातावरण होते. सकाळी साडेअकरा-बाराच्या सुमारास पावसाला सुरुवात झाली. काही क्षणातच पावसाचा जोर वाढल्याने पुणेकरांची तारांबळ उडाली. अवघ्या काही मिनिटात अनेक ठिकाणी तळी साचली होती.
पुण्याबरोबरच राज्यातही रविवारी अनेक ठिकाणी पावसाने हजेरी लावली. रत्नागिरी येथे १९, नाशिक येथे १५, सोलापूर येथे ६, सांगली येथे ५, मुंबई व कोल्हापूर येथे प्रत्येकी २ तर अकोला येथे ०.२ मिलिमीटर पावसाची नोंद झाली. तर राज्यातील सर्वाधिक तापमान अकोला येथे (४२.७ अंश सेल्सिअस) नोंदले गेले. पुढील दोन दिवसात कोकणात बहुतांश ठिकाणी, मराठवाड्यात बऱ्याच ठिकाणी, मध्य महाराष्ट्रात काही ठिकाणी तर विदर्भात तुरळक ठिकाणी पावसाची शक्यता आहे.
मराठवाडा भिजला
मराठवाड्यात सर्वत्र रविवारी दुपारी पावसाने हजेरी लावली. बीड, लातूर, उस्मानाबाद व जालना जिल्ह्यात मध्यम स्वरुपाच्या पावसाने बळीराजा सुखावला आहे. पावसामुळे मराठवाड्यात आठ जणांचा आणि अनेक प्राण्यांचा मृत्यू झाला आहे.
मुंबईत पाऊससोहळा
उकाड्याने हैराण झालेल्या मुंबईकरांना मान्सूनपूर्व सरींनी रविवारी सुट्टीचा मुहूर्त साधत सुखद धक्का दिला आणि मुंबईकरांनी सहकुटुंब पाऊससोहळ्याची मजा लुटली.
आज, उद्याही पाऊस
अरबी समुद्रात तयार झालेल्या कमी दाबाच्या क्षेत्रामुळे या सरी बरसत असून, येत्या ४८ तासांतही पावसाची धुवांधार फटकेबाजी सुरू राहील, असा अंदाज हवामान खात्याने वर्तवला आहे. मान्सून १० जूनपर्यंत कोकण आणि गोव्यात दाखल होणार असल्याचा अंदाजही व्यक्त करण्यात आला आहे.
'सरासरी'चा दिलासा
भारतीय हवामान खात्याने अपुऱ्या पावसाचा अंदाज वर्तवल्याने सलग दुसऱ्या वर्षी दुष्काळाची भीती दाटलेली असतानाच, 'या वर्षी सरासरीइतका पाऊस पडेल', असा अंदाज वर्तवत 'स्कायमेट' या खासगी हवामान एजन्सीने काहीसा दिलासा दिला आहे. एल निनो फॅक्टरचा फटका बसण्याची शक्यता कमी आहे, असेही भाकीत केले आहे.
मोबाइल अॅप डाउनलोड करा आणि राहा अपडेट
