ससून हॉस्पिटलच्या आवारात गेल्या तीन ते चार वर्षांपासून प्रलंबित असलेली अकरा मजली इमारतीचे काम पूर्ण करण्यास प्राधान्य देण्यात येईल. त्यासाठी आवश्यक निधीची तरतूद करण्यासाठी प्रयत्न केले जाईल, अशी माहिती पालकमंत्री गिरीश बापट यांनी दिली.
पालकमंत्री बापट यांनी स्वतःहून ससूनच्या विविध प्रलंबित प्रश्नांसंदर्भात बैठक आयोजित केली होती. त्या वेळी आमदार जगदीश मुळीक, अतिरिक्त जिल्हाधिकारी प्रदीप पाटील आदी उपस्थित होते. बैठकीनंतर ते पत्रकारांशी बोलत होते. ससूनचे अधिष्ठाता डॉ. अजय चंदनवाले यांनी ससूनच्या विविध प्रलंबित प्रश्नांची माहिती पालकमंत्र्यांना दिली. त्यावेळी वैद्यकीय शिक्षणमंत्री, अर्थमंत्री यांच्यासोबत चर्चा करण्यासाठी बैठक घेऊन प्रश्न मार्गी लावण्याचे आश्वासन दिले. कॅन्सर हॉस्पिटल, वाढील एफएसआय, महाराष्ट्र मानसिक आरोग्य संस्था या विविध प्रश्नांकडे लक्ष वेधण्याचा प्रयत्न प्रशासनाने केला. 'हे सर्व विषय बाजूला ठेवा', अशा सूचना पालकमंत्र्यांनी दिल्या.
'ससूनची अकरा मजली इमारत पूर्ण करण्यावर आपला भर राहील. इमारत पूर्ण करण्यास निधीची किती गरज आहे. त्यामुळे अर्थसंकल्पात पुरवणी मागणी करून निधी उपलब्ध केला जाईल. ससूनच्या या प्रकल्पासाठी किती निधी मिळतो त्यावर अकरा मजली इमारत पूर्ण कधी होईल हे सांगता येईल. ससूनमधील सध्याच्या बाह्यरुग्ण विभागाचे नूतनीकरण करण्यासाठी दगडूशेठ हलवाईने सात ते आठ कोटी रुपये खर्च करण्याची तयारी दाखविली. त्यासाठी परवानगी देण्यात येईल. त्यामुळे नवीन इमारतीत तीन मजल्याचे काम पूर्ण करून त्या ठिकाणी सध्याचे बाह्यरुग्ण स्थलांतरीत करण्याच्या सूचनाही बांधकाम विभागाला दिल्या आहेत', असे पालकमंत्री गिरीश बापट यांनी सांगितले.
स्वस्तातील जेनेरीक औषध केंद्रासाठी वीस लाख रुपये उपलब्ध करून दिले आहेत. त्यासाठी जागा उपलब्ध करून देण्याचे आदेश ससून प्रशासनाला दिले. ससूनच्या विकासासाठी खासदार, आमदार निधीतून निधी उपलब्ध करावा तसेच विविध औषध कंपन्यांच्या सामाजिक उपक्रमातून निधी मिळविण्याच्या सूचना बापट यांनी दिल्या.
मेडिकल आर्किटेक्टची नियुक्ती करा
ससून हॉस्पिटलची अकरा मजली इमारत बांधत असताना त्यासाठी मेडिकल आर्किटेक्टची नियुक्ती का केली नाही असा सवाल करीत पालकमंत्री गिरीश बापट यांनी बांधकाम विभागाच्या अधिकाऱ्यांसह ससूनच्या अधिकाऱ्यांना चांगलेच फैलावर घेतले. मेडिकल आर्किटेक्ट तातडीने नेमण्याचा प्रस्ताव पाठवून त्याचा पाठपुरावा करण्याचे आदेशही बापट यांनी दिले.
मोबाइल अॅप डाउनलोड करा आणि राहा अपडेट