मोबाइल अॅप डाउनलोड करा आणि राहा अपडेट
पुणेः आर्थिक अडचणीत आलेल्या रुपी बँकेचा प्रश्न सोडवावा, या मागणीसाठी ठेवीदार संघटनेने मंगळवारी सहकार विभागाचे अपर निबंधक सुनील पवार यांना घेराव घातला. रुपी बँकेवर गेल्या दोन वर्षांपासून रिझर्व्ह बँकेने निर्बंध लागू केले आहेत, त्यामुळे सुमारे सात लाख ठेवीदार खातेदार अडचणीत आले आहेत. बँकेच्या विलिनीकरणाचे प्रयत्न सहकार खात्याकडून करण्यात आले, मात्र अद्याप त्याला यश मिळालेले नाही. त्या पार्श्वभूमीवर पुणेकर नागरीक कृती समितीच्या वतीने सहकार आयुक्तांच्या कार्यालयावर मोर्चा काढण्यात आला. सहकार आयुक्त चंद्रकांत दळवी मुंबईत होते, त्यामुळे समितीच्या नेत्यांनी अपर निबंधक सुनील पवार यांची भेट घेतली आणि त्यांच्या कार्यालयात ठिय्या दिला. थकीत कर्जाची वसुली करावी, प्रशासकांची बदली करा आणि ठेवीदार खातेदारांची सुटका करा, अशा मागण्या या वेळी करण्यात आल्या. मिहीर थत्ते, दत्ता घुले आदी या वेळी उपस्थित होते. याबाबत चर्चा करून पुढील पावले उचलण्याचे आश्वासन पवार यांनी दिले.
