पुणे रेल्वे स्टेशनवर प्रवाशांसाठी मुलभूत सोयीसुविधांचा विस्तार केला जाणार आहे. या उपक्रमाअंतर्गत पिण्याचे निशुल्क शुद्ध पाणी (आरओ) उपलब्ध करून देण्यात आले आहे. तर, लवकरच वातानुकूलित स्वच्छतागृह उभारण्यात येणार आहे, अशी माहिती रेल्वेच्या पुणे विभागाचे व्यवस्थापक सुनीत शर्मा यांनी दिली.
रेल्वेच्या प्रवासी सल्लागार समितीची बैठक नुकतीच झाली. या बैठकीत त्यांनी ही माहिती दिली. वरिष्ठ वाणिज्य व्यवस्थापक गौरव झा आणि प्रवासी प्रतिनिधी यावेळी उपस्थित होते. रेल्वेच्या पुणे विभागातील अनेक स्टेशनवर प्रवाशांना चांगल्या सुविधा उपलब्ध करून देण्यासाठी विविध कामे हाती घेण्यात आली आहेत. पुणे स्टेशनला प्लॅटफॉर्म क्रासिंगसाठी दोन नवीन पुल उभारण्याचे काम सुरू आहे. वेटिंग रूमचे सुशोभिकरणाचे काम केले जाणार आहे. गाडी आणि प्लॅटफॉर्ममधील अंतर जास्त असल्याने चालू गाडीमध्ये बसण्याच प्रयत्न करताना अनेकदा प्रवासी पडतात. त्यामुळे कोल्हापूर, पुणे, लोणावळा या स्टेशनच्या दरम्यानच्या स्टेशनच्या फ्लॅटफॉर्मची उंची वाढविणे आदी कामे केली जाणार आहेत. यातील काही कामे पूर्णत्वास आलेली आहेत, काही लवकरच पूर्ण होतील, अशी माहिती शर्मा यांनी दिली. तसेच, खडकी, चिंचवड, कोल्हापूर, मिरज या स्टेशनवर सीसीटीव्ही कॅमेरे बसविण्याचा प्रस्ताव असल्याचेही त्यांनी सांगितले.
प्रवाशांची गैरसोय टाळण्याची मागणी
सोलापूर-पुणे किंवा मनमाड-पुणे पॅसेंजर गाडी उशिराने धावत असेल, तेव्हा प्रवाशांची गैरसोय टाळण्यासाठी पटना-पुणे गाडी उरळीकांचनमध्ये थांबविण्यात यावी. तसेच, बारामती पॅसेंजर गाडीचे डब्बे वाढविण्यात यावे, अशी मागणी प्रवासी प्रतिनिधिंनी केली. पुणे स्टेशनवरून रात्री धावणाऱ्या गाड्यांच्या आरक्षित डब्यांमध्ये खूप गर्दी होते. परिणामी, चढ-उतार करताना अडचण येते. त्यामुळे रेल्वे पोलिस कर्मचारी किंवा टिसी यांना याबाबत काळजीपूर्वक लक्ष देण्याची सूचना करावी, असे प्रतिनिधी म्हणाले.
मोबाइल अॅप डाउनलोड करा आणि राहा अपडेट
