शहरातील सर्वात मोठी बाजारपेठ म्हणून पिंपरीतील कॅम्प परिसराकडे पाहिले जाते. मात्र, येथील आडमुठ्या व्यापारी आणि रहिवाशांमुळे वाहतुकीची कोंडी कायम राहिली आहे. नो पार्किंग, नो एंट्री असले नियम आपल्यासाठी नाहीतच अशा पद्धतीने येथील व्यापारी वागताना दिसून येत आहेत. विशेष म्हणजे पोलिस आयुक्तालयातील वरिष्ठांकडून देखील या भागाकडे नेहमीच दुर्लक्ष झाले आहे.
बाजारपेठेतील कोंडी सोडविण्यासाठी पिंपरी-चिंचवड महापालिकेने साई चौकातून पुणे-मुंबई महामार्गाकडे जाण्यासाठी लोहमार्गाखालून भुयारी मार्ग तयार केला आहे. त्यामुळे वाहतूक समस्येला थोडा दिलासा मिळाला आहे. सध्या हा रस्ता उद्‌घाटनाच्या प्रतीक्षेत आहे. पण त्याचा वापर लोकांनी सुरू केला आहे. मात्र, येथील व्यापाऱ्यांच्या बेशिस्त वाहतुकीला राजकीय पाठबळ असल्याने भुयारी मार्गासमोरच वाहने पार्क केली जात आहेत.
या ठिकाणी वाहने उचलून नेण्यासाठी कारवाई करणाऱ्या पोलिसांवर दबाव आणला जातो. वाहनांमधून लाखो रुपयांची चोरी होणे, खोटे कॉल देणे आदी प्रकार या ठिकाणी कायम होताना दिसत आहेत. वाहतूक कोंडी आणि अपुऱ्या पार्किंगमुळे लोकांनी या बाजारपेठेकडे पाठ फिरवल्याचे दिसून येत आहे. नव्या भुयारी मार्गामुळे उंचीने कमी वाहनांसाठी वळसा घालून जाण्याऐवजी मध्यमार्ग उपलब्ध झाला आहे. मात्र त्यासाठी येथील अतिक्रमण आणि रस्त्यामधील वाहने हटविणे गरजेचे आहे.
छोट्या वाहनांसाठी हा भुयारी मार्ग सुरू झाल्यामुळे रिव्हर रस्ता व इंदिरा गांधी उड्डाणपुलावरील ताण कमी झाला आहे. मात्र पिंपरी कॅम्पमध्ये व्यापारी आणि नागरिक वारंवार नियमांचे उल्लंघन करताना दिसून येतात. बेकायदा पार्किंगलाही व्यापाऱ्यांचे पाठबळ मिळालेले आहे. या ठिकाणची वाहतूक कोंडी टाळण्यासाठी या ठिकाणी कडक कारवाई करण्यात येणार आहे.
- महेंद्र रोकडे, सहाय्यक आयुक्त, वाहतूक विभाग, पिंपरी पोलिस
मोबाइल अॅप डाउनलोड करा आणि राहा अपडेट
