पिंपरी-चिंचवड महापालिकेच्या यशवंतराव चव्हाण हॉस्पिटलसाठी खरेदी करावयाच्या सोनोग्राफी मशिनची बाजारातील किंमत दहा लाख रुपये असल्याच्या बायोमेडिकल अभियंत्यांच्या अभिप्रायाकडे दुर्लक्ष करत असल्याचा आरोप नगरसेविका सीमा सावळे यांनी केला आहे. तसेच हे मशीन सुमारे १८ लाख रुपयांना खरेदी करण्याचा घाट घालण्यात आला असल्याचा आरोप करून मशीन खरेदीसाठी फेरनिविदा काढण्याची मागणी सावळे यांनी केली आहे.
'वायसीएम' हॉस्पिटलसाठी अत्याधुनिक डिजिटल सोनोग्राफी मशीन खरेदी करण्यासाठी १८ लाख रुपये खर्चाला मंजुरी देण्याचा प्रस्ताव स्थायी समिती सभेपुढे आहे. त्यावर आक्षेप नोंदवत सावळे यांनी हे मशीन अवास्तव दराने खरेदी करत असल्याचा आरोप केला होता. त्यामुळे 'स्थायी'च्या गेल्या बैठकीत प्रस्ताव तहकूब ठेवण्यात आला होता. त्यावर आज, मंगळवारी होणाऱ्या बैठकीत चर्चा होऊन, निर्णय होण्याची शक्यता आहे. परंतु, बायोमेडिकल अभियंत्यानी एक वर्षापूर्वी दिलेला अभिप्राय विचारात घेऊन खरेदीचा निर्णय रद्द करावा, या मागणीचा पुनरुच्चार केला आहे.
पालिकेच्या वैद्यकीय विभागाने अत्याधुनिक डिजिटल सोनोग्राफी मशीन खरेदीसाठी कंपन्यांकडून दरपत्रक मागविले होते. त्यानुसार पुण्यातील मेसर्स एर्बिस इंजिनीअरिंग या पुरवठादार ठेकेदाराने ७९ लाख ४६ हजार १४६ रुपये, मेसर्स चित्रा सेल्स अँड सर्व्हिसेस यांनी एक कोटी १३ लाख ८९ हजार रुपये आणि मेसर्स युनायटेड मेडिकल सोल्युशन्स यांनी एक कोटी एक लाख ४३ हजार २४५ रुपये दरपत्रक सादर केले होते. परंतु, दरपत्रक जास्त असल्याने वैद्यकीय अधिकारी डॉ. अनिल रॉय यांनी बाजारातील दरासंदर्भात बायोमेडिकल अभियंता यांच्याकडून अभिप्राय मागितला होता.
त्यानुसार, अभियंत्यांनी 'तोशिबा' कंनपीचे अत्याधुनिक डिजिटल सोनोग्राफी मशीन २० लाख ९३ हजार ४७४ रुपये आणि 'मिंडरे' कंपनीचे मशीन १० लाख ७ हजार ९२२ रुपयांना बाजारात उपलब्ध असल्याचा अभिप्राय चार जानेवारी २०१४ रोजी दिला आहे; मात्र त्याकडे दुर्लक्ष करून वैद्यकीय विभागाने सोनोग्राफी मशीन खरेदीसाठी २५ लाख ३४ हजार रुपयांची निविदा प्रसिद्ध केली. यापूर्वी याच मशिनसाठी एक कोटी १३ लाख रुपये दरपत्रक सादर करणाऱ्या मेसर्स चित्रा सेल्स अँड सर्व्हिसेस या पुरवठादार ठेकेदाराने आता २२ लाख रुपयांत मशीन देण्याची तयारी दर्शवली आहे.
नागरिकांची लूट थांबवावी
'महापालिकेच्या बायोमेडिकल अभियंता यांनी अभिप्राय देऊनही जादा दराने सोनोग्राफी मशीन खरेदीचा प्रयत्न होत आहे. तसेच ज्या पुरवठादार ठेकेदाराने आधी एक कोटी १३ लाखांचे दरपत्रक सादर करून नंतर एकदम ५४ लाख १२ हजार १४६ रुपयांनी दर कमी केला. याचाच अर्थ महापालिकेच्या साहित्य खरेदीसाठी ठेकेदार, अधिकारी आणि काही पदाधिकारी संगनमताने जादा दर सादर करून करदात्या नागरिकांच्या पैशांची लूट करतात, हे स्पष्ट होते. त्यामुळे महापालिका आयुक्त राजीव जाधव यांनी जनतेची ही लूट थांबवून सोनोग्राफी मशीन खरेदीसाठी फेरनिविदा मागवावी,' असे नगरसेविका सीमा सावळे म्हणाल्या.
मोबाइल अॅप डाउनलोड करा आणि राहा अपडेट